Palacios afala a VOX a destinar les perres que recibe de la Xunta a pagar traductores

"Nun lo va facer, porque nun tienen un problema de comprensión", recuerda'l diputáu de Podemos, qu'acusa a la ultraderecha "de querer dividir a la sociedá asturiana".

Rafael Palacios amosó la so disconformidá cola decisión de la Mesa de la Cámara pa proceder nel casu de qu'un parrlamentariu asturianu dixera nun entender l'asturianu o gallego-asturiano llueu d'una intervención nestes llingües. “Tamos fondamente procupaos pol escenariu políticu que se ta abriendo na Xunta Xeneral, na que per primer vez na historia se ta impiendo l’usu de les llingües propies d’Asturies”, afirmó al tiempu que calificó la situación provocada por VOX como un "ataque a les instituciones democrátiques".

"Tolos grupos políticos de la Cámara espresaron que nun tienen nengún tipu de problema cola utilización del gallego-asturiano y del asturianu. Namái ún, VOX, la ultraderecha, espresó, con esa voluntá de xenerar bronca, que nun lo entiende. Esi grupu recibe cuasi 25.000 euros al mes de subvención de la Xunta Xeneral y cuasi 300.000 euros al añu. Con eses perres, al igual que contrata fotógrafos o periodistes, o otres persones que necesita pa l'actividá parllamentaria, que pa eso son, si fora cierto que nun entiende podía utilizales pa resolver esi problema. Pero nun lo va facer, porque nun tienen un problema de comprensión, porque l'asturianu y el gallego-asturiano entiéndese perfeutamente como lo vivimos cada día na cai", asegura.