Blanco diz qu'usará la prensa pa enterase de la intervención de Barbón

El diputáu de VOX afirmó "nun entender dafechu" la respuesta del presidente n'asturianu a una entruga de Podemos.

Ignacio Blanco nun abandonó nesta ocasión l'hemiciclu cuando tanto Daniel Ripa como Adrián Barbón emplegaron la llingua asturiana na sesión del Plenu de la Xunta Xeneral. Sicasí, el xixonés aprovechó la so pregunta, que siguió a la del voceru de la formación morada, p'amosar la so disconformidá al presidente pol usu del asturianu nel Parllamentu asturianu.

"Llamento nun entender dafechu la intervención anterior, pero lleerela mañana n'español en tolos medios de comunicación", espresó na so réplica a la respuesta del socialista. L'argumentu d'una supuesta dificultá de comprensión del asturianu por parte de los diputaos de VOX ye'l que vien emplegando esta formación pa tratar de torgar l'usu de idioma na Cámara, llegando inclusive a presentar un recursu d'inconstitucionalidá de la reforma del Reglamentu de la Xunta Xeneral, que'l Tribunal Constitucional tornó.