Parres: un pasu atrás nuevu na recuperación llingüística

Una propuesta de Foro pa recuperar el topónimu castellanu 'Arriondas' sal alantre col apoyu d'IX, PSOE y PP. La escusa pa esti pasu atrás nuevu na recuperación toponímica ye la confusión que l'usu de 'Les Arriondes' lleva supuestamente ente los turistes.

D'esta forma, la denominación oficial aprobada nel 2009 pasaría a ser billingüe, 'Arriondas/Les Arriondes', como s'escoyó dende un primer momentu en delles poblaciones como 'Gijón/Xixón' o 'Llangréu/Langreo'. Ensin dulda un grave pasu atrás que se fundamenta en posibles confusiones ente los turistes y supuestes "razones históriques", apuntaron dende'l grupu municipal de Foro en Parres.

El restu de formaciones con representación apoyaron la propuesta forista, ente ellos Izquierda Xunida (IX), argumentando que la midida podría ser bona pal turismu. El PSOE defendió la falta d'alegaciones nel 2009 a la denominación única asturiana, pero tamién sofitó'l cambiu, mentes que'l PP criticó que'l gobiernu municipal promoviera nel so día la modificación del topónimu pa siguir utilizando'l castellanu nos documentos del conceyu.

Esti cambiu sigue'l mesmu guión que'l vivíu recién en Bual, onde una supuesta polémica vecinal amplificada por un diariu de tirada nacional provocó la celebración d'un Plenu pa recuperar el topónimu castellanu 'Boal', pasando a ser la denominación oficial 'Boal/Bual'. Al igual qu'en Parres, el PSOE, PP, Foro y IX foron les formaciones que dieron el preste a la midida.

"Decisión illegal"

Tres conocer esta situación, Iniciativa pol Asturianu emitió un comunicáu nel que califica la decisión de "illegal", yá que "contradiz l'espíritu de la Llei d'Usu del Asturianu de 1998, qu'establecía l'oxetivu de recuperar la toponimia tradicional nun procesu que, ta bien recordalo, inicien los propios conceyos por petición a la Xunta de Toponimia, organismu que fai les investigaciones y lleva al Plenu los resultaos pal so discutiniu".

La organización cívica recuerda que "nel 2009 naide punxo en dulda que'l topónimu tradicional, el qu'usaren los parragueses pa refirise a la cabeza del so conceyu yera Les Arriondes". Asina afirma que "usar les ferramientes qu’establez la Llei d'Usu del Asturianu pa iniciar un cambiu contrariu al espíritu recuperador y normalizador de lo tradicional del testu llegal, va contra derechu".

"Iniciativa pol Asturianu estudia les midíes a tomar nesti asuntu, pero quier dexar claro que tolos partíos tán incumpliendo con esta midida los sos programes políticos, que d'una o d'otra manera falen de la promoción del asturianu, pero especialmente grave ye que la propuesta salga d'un partíu que diz defender la oficialidá y que cunte colos votos d'otra formación que tamién la lleva nel programa, como ye Izquierda Xunida. Dende la organización pidiremos a los partíos que tomen midíes contra esta situación, que vaigan en consonancia col so programa", calca nel comunicáu.