El Gobiernu oficializa los topónimos tradicionales de Bual y modifica trés de los yá aprobaos en Carreño

La toponimia tradicional de Bual yá ye oficial. El Conseyu de Gobiernu dio lluz verde a l’aprobación de los topónimos del conceyu occidental y tamién a la modificación de trés nomes de llugar de Carreño por pidimientu de la Casa Conceyu.

Tres la espublización nel BOPA, la forma Bual pasa a ser la denominación única pa la población en sustitución de la forma castellana Boal. Esta decisión del Gobiernu d’Asturies, que fai cumplir la Llei de Promoción y Usu de Bable/Asturianu, ta teniendo cierta discusión al traviés de les redes sociales por ún númberu reducíu de ciudadanos, anque’l serviciu d’altavoz dau por un mediu de comunicación podría llevar al Conceyu de Bual a solicitar la denominación billingüe ‘Bual/Boal’.

Una situación mui asemeyada asocedió en Carreño y finalmente la polémica dio sus frutos, provocando’l cambiu de trés topónimos. Ye’l casu de Quimarán, El Pieloro y El Riistru, que pasen a denominase de manera oficial ‘Quimarán/Guimarán’, ‘El Pieloro/Piedeloro’ y ‘El Riestro’, de manera respeutiva. Estes modificaciones vienen tres el pidimientu fechu pola Casa Conceyu poles presiones recibíes. Nel so día, un videu asoleyáu pol coleutivu Anonymous AST demostraba que los topónimos recoyíos pola Xunta Asesora de Toponimia yeren los tradicionales.