Bual pasa a tener como oficial el topónimu 'Boal/Bual'

Pasu atrás nel procesu d'oficialización de la toponimia tradicional. Bual recupera un añu depués el términu castellanizáu y pasa a denominase de manera billingüe: 'Boal/Bual'.

El 20 de febreru del 2014 espublizábase nel Boletín Oficial del Principáu d'Asturies (BOPA) la toponimia oficial nueva del conceyu de Bual, que dexaba atrás la castellanizada p'adaptar la tradicional. D'esta forma, Boal pasaba a denominase de manera oficial Bual, cambiu que xeneró una protesta d'un pequeñu sector de vecinos que tuvo l'apoyu d'un diariu asturianu, que fixo d'altavoz creando polémica onde nun la había. Esta situación provocó que'l Plenu municipal solicitara por unanimidá (PSOE, PP, Foro y IX-LV) a la Conseyería d'Educación, Cultura y Deporte, díes depués de l'aprobación del decretu de toponimia, una modificación del mesmu pa que la capital de conceyu tuviera una denominación billingüe. El miércoles pasáu, el BOPA oficializaba esti pasu atrás.