Os Ozcos lleva'l Premiu al Pueblu Exemplar d'Asturies

La rexón que conformen Samartín, Santalla y Vilanova resultó ganadora de la ventésima sétima edición del gallardón.

La Fundación Princesa de Asturias fixo público a les 14 hores de güei'l fallu del XXVII Premiu al Pueblu Exemplar d'Asturies. El xuráu escoyó merecedora del premiu a la rexón d'Os Ozcos ente les venti candidatures qu'optaben al títulu que premia los pueblos, aldees, núcleos de población, espacios paisaxísticos o grupos humanos que destaquen "de mou notable na defensa y conservación del so entorno natural, ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obras comunales u otres manifestaciones de solidaridá sobresalientes”.

"Los sos vecinos foron quien, nes trés décades últimes, d'articular un plan coleutivu que combina de manera equilibrada tradición y modernidá, auniendo la conservación de la ñatura y el patrimoniu cultural col desarrollu económicu basáu na ganadería y el turismu rural", esplica'l xuráu nel so acta, nel que pon a Os Ozcos como "un exemplu a destacar, sobre manera nesti tiempu de crisis del mediu rural n'Asturies".