Organizaciones polítiques y coleutivos preparen actos pa celebrar el Día de la Nación Asturiana

La reivindicación y la folixa van protagonizar los diferentes actos que se van entamar el 8 de setiembre, xornada na que se celebra de manera oficial el Día de la Nación Asturiana. #LluchandoPolaSoberanía desplázase esti añu a Cangues d’Onís en respuesta a la visita de la monarquía española al país.

La fecha del 8 de setiembre ta yá mui cercana y organizaciones polítiques y coleutivos yá tienen bien defeníes les sos actividaes pa celebrar el Día de la Nación Asturiana, que va centrar los sos actos oficiales en Casu y Cuadonga, nesti casu con motivu del triple centenariu que se conmemora esti 2018: el primeru de la coronación canónica de la Santina y de la creación del Parque Nacional de la Montaña de Covadonga, actualmente Picos de Europa, y el decimoterceru de los oríxenes del Reinu d’Asturies. Esti eventu últimu va tar marcáu pola visita de les reis d’España y de la princesa de Asturias, no que va ser la so primer visita oficial al país.

Como respuesta a la presencia de los monarques españoles y de la heredera del tronu, #LluchandoPolaSoberanía tresllada l’habitual actu reivindicativu pol Día de la Nación Asturiana d’Uviéu a Cangues d’Onís. Baxo’l lema ‘Asturies nun tien rei. Soberanía y república’ ta prevista una marcha a pie de 7 quilómentros ente Les Arriondes y Cangues, con salida a les 11 hores y llegada al rodiu les 13 hores, onde va haber una concentración de protesta y delles actividaes.

“Metanes d'una crisis y colapsu social total n'Asturies, la monarquía española torna a echar mano del más ranciu cuadonguismu y pretende llexitimar la so propia existencia falsiando la hestoria y faciéndose pasar per continuadores del Reinu d'Asturies, estructura política ayena a la idea de España y a los propios borbones”, espresen dende esti coleutivu, que fai un llamáu “a movilizase nel mesmu sitiu y hora esti 8-S a toles persones y organizaciones de la izquierda y republicanismu n'Asturies como yá facemos n'Uviéu na selmana de los premios de la vergoña”, en referencia a los Premios Princesa de Asturias, tando yá confirmáu'l sofitu d'Andecha Astur. Pa facilitar l’asistencia a esta marcha tán entamándose autocares dende les principales ciudaes del país a un costu de 10 euros, pa lo qu’encamienten acutar plaza con antelación pa facilitar la organización de les rutes.

Actos en Xixón

Podemos y Izquierda Xunida (IX) apuesten esti añu por celebrar en Xixón actos políticos nos que la música va ser protagonista. Asina, la formación morada entama una Folixa Popular nel nomáu Solarón nel que destaquen les actuaciones musicales de Dixebra, Jerónimo Granda y los madrilanos Tremenda Jauría.

Amás va instalase un mercáu ecolóxicu y cultural, y organizase talleres, xuegos tradicionales y actividaes de toda triba dende les 12 hores. Na xornada previa tamién ta prevista una ‘Nueche en Danza’.

El Muséu del Pueblu d’Asturies va acoyer la celebración d’IX, col actu políticu ‘Asturies pela izquierda’ y los conciertos de Spanta la Xente, Kike Suárez y Javi Colero, y La Cosa Nostra. Tamién van celebrase una gran cantidá d’actividaes mientres tola xornada, con una espicha popular y xuegos tradicionales, ente otres.

Pela so parte, el Partíu Asturianista, que trabaya na organización del actu de presentación del llibru que cuenta los 30 años d’historia de la formación política, previstu pa les feches cercanes al 8 de setiembre, va celebrar la so tradicional xinta de xeremendía ente militantes y simpatizantes.