Marcha y concentración en Cangues pal 8 Setiembre

Como respuesta a la presencia de los monarques españoles y de la heredera del tronu, LluchandoPolaSoberanía tresllada l’habitual actu reivindicativu pol Día de la Nación Asturiana d’Uviéu a Cangues d’Onís. 

Baxo’l lema ‘Asturies nun tien rei. Soberanía y república’ LluchandoPolaSoberanía  convoca a "toles asturianes y asturianos que comparten los valores del republicanismu y el rechazu a la monarquía, defendendo un modelu social meyor p'Asturies, nos que la soberanía popular y la xusticia social seyan pegollos d'una Asturies con futuru". 

Enantes de los actos en Cangues ta prevista una marcha a pie de 7 quilómentros dende Les Arriondes, con salida a les 11 hores y llegada al rodiu les 13 hores, onde va haber una concentración de protesta yá que, según los convocantes, “metanes d'una crisis y colapsu social total n'Asturies, la monarquía española torna a echar mano del más ranciu cuadonguismu y pretende llexitimar la so propia existencia falsiando la hestoria y faciéndose pasar per continuadores del Reinu d'Asturies, estructura política ayena a la idea de España y a los propios borbones”, espresen dende esti coleutivu, que fai un llamáu “a movilizase nel mesmu sitiu y hora esti 8-S a toles persones y organizaciones de la izquierda y republicanismu n'Asturies como yá facemos n'Uviéu na selmana de los premios de la vergoña”, en referencia a los Premios Princesa de Asturias. 

La marcha dende Les Arriondes ta pensada pa que pueda realizala tou tipu de persones, neñes, neños y mayores y na que compartir un espaciu de reivindicación plural. Ente la negación de Delegación de Gobiernu a que la marcha discurra pel marxe derechu de la carretera, la ruta va dir en paralelo, pela sienda peatonal. Pa facilitar la llegada a Les Arriondes van ponese dos autobuses con una ruta pel interior y otra pela costa, dende la organización informen que la rempuesta ta siendo mui bona y les poques places que queden disponibles cuenten con que se van llenar d'equí al miércoles, que ye'l día últimu p'acutar sitiu.

Dende LluchandoPolaSoberanía quieren nesti 8 setiembre dar un pasu p'avanzar "na construcción d'un modelu políticu alternativu p'Asturies, un modelu basáu na Xusticia Social y la Soberanía del Pueblu que garantice un futuru dignu pa toes les asturianes y el restu de pueblos del mundu".

Esta convocatoria ta siendo sofitada por organizaciones y colectivos que yá confirmaron la so participación, como: Darréu Mocedá d'Izquierda Soberanista, Xunta Estudiantil Asturiana, Corriente Sindical d'Izquierda Asturies, Memoria Histórica Democrática de Asturias, FUSOA , Los Centros Sociales: Espaciu La Llegra, Centru Social Autoxestionáu La Llume, Cambalache -el local-, Llar El Mataderu y Sestaferia Centru Social, Asturies Laica, Les Violetes, Bloque Críticu, Asturies Rebelde, Bujarra_AST y los partios políticos Andecha Astur, Izquierda Asturiana (IAS), Partido Comunista de Asturias, UJC/Mocedá Comunista Asturies.