Escolinguen una pancarta contra la monarquía española na ponte de Cangues d'Onís

L'aición tuvo llugar na mañana del domingu y na tela podía lleese 'Asturies nun tien rei. Soberanía. República', lema de la marcha convocada pal Día de la Nación Asturiana.

#LluchandoPolaSoberanía organiza la protesta convocada esa xornada en respuesta a la visita de los monarques españoles a Cuadonga coincidiendo col 8 de setiembre, Día de la Santina, pa celebrar el triple centenariu que se conmemora esti añu, ente ellos l'orixe del Reinu d'Asturies. Ésta va consistir nuna marcha a pie de 7 quilómentros ente Les Arriondes y Cangues d'Onís, con salida a les 11 hores y llegada al rodiu les 13 hores, y una concentración de protesta y delles actividaes na villa.

Dientro de la campaña pa difundir esti actu, al que convoquen "a toles persones y organizaciones de la izquierda y republicanismu n'Asturies", ta encuadrada esta aición reivindicativa que tuvo como protagonista un llugar con tanta repercusión como la ponte de Cangues. Asina, mientres dellos minutos, militantes del movimientu #LluchandoPolaSoberanía escolingaron la pancarta énte la mirada de les munches persones que s'averen los domingos a la villa, día de mercáu, y de los turistes que visiten la zona esti mes d'agostu.

Autocares

Pa facilitar l’asistencia a la marcha del 8 de setiembre tán entamándose autocares dende les principales ciudaes del país a un costu de 10 euros, pa lo que #LluchandoPolaSoberanía encamienta acutar plaza con antelación pa facilitar la organización de les rutes.