Diecinueve formaciones presenten candidatura pa les Nacionales de mayu

Un total de diecinueve formaciones presentaron la so candidatura a les eleiciones a la Xunta Xeneral del 24 de mayu. Andecha Astur, Foro y URAS, les úniques que nun son de calter estatal.

Según la llista espublizada nel BOPA esti miércoles, les organizaciones qu'aspiren a algamar el Gobiernu del país son el PSOE, PP, Escaños en Blanco, EQUO, Movimiento de Renovación Democrática Ciudadana (Movimiento RED), UPyD, PACMA, IU-IX, Foro de Ciudadanos, PCPE, Podemos, Ciudadanos-Partido de la Ciudadanía (C's), Vox, Agrupación de Electores Recortes Cero, Andecha Astur, MSR, URAS, Partido Humanista y FE de las JONS. Toles organizaciones presenten candidatures a les trés circunscripciones, a esceición de FE de las JONS (oriente), URAS (occidente), Partido Humanista (oriente), Movimiento RED (central) y Vox (central).

Los candidatos de les formaciones parllamentaries son Javier Fernández (PSOE), actual presidente del país; Mercedes Fernández (PP); Adán Fernández Veiguela (UPyD); Gaspar Llamazares (IU-IX); y Cristina Coto (Foro). Según les encuestes, Podemos, lideráu por Emilio León, y Ciudadanos, encabezáu por Nicanor García Fernández y col diputáu nesta llexislatura Ignacio Prendes, ex d'UPyD, como númberu dos, podríen optar a bonos resultaos. Andecha Astur, mentes, presenta como cabeces de llista a Paulo Arboleya (centru), Balbina María Berta Labra (oriente) y Antonio Fuertes Rodríguez (occidente), y URAS, que va namái pol occidente, a José Manuel Suárez Mata. Un total de 988.038 asturianos y asturianes cuenten con derechu a votu pa estes eleiciones, que van celebrase'l 24 de mayu.