Nun hai alcuerdu sobre la Llei d'Academies d'Asturies, lo que dexa nel aire'l futuru de l'ALLA

L'anunciáu consensu nun foi posible y la falta final d’alcuerdu sobre la propuesta de modificación del artículu 2 de la Llei 5/1997 d’Academies que va llevar Izquierda Xunida (IX) a la Xunta Xeneral frena una solución pa la institución qu’ha de llegar nun tiempu máximu de 15 díes.

Cuando paecía que yera cuestión de tiempu l’anuncia del alcuerdu afayadizu que permitiera a l’ALLA recuperar el so status d’entidá pública que se-y niega anguaño, considerándola privada, lo que conlleva que reciba una subvención en llugar d’una tresferencia pública como venía asocediendo dende la so creación, delles discrepancies paralizaron esta vía propuesta por IX.

La FSA-PSOE desmarcóse finalmente de la mesma, mentes que Ciudadanos decidió nun sofitala. Nel casu de Podemos, ve bien la vía de la modificación de la llei, anque la formación morada tien n'estudiu la situación del personal de l'ALLA pola so política con respeuto al emplegu públicu, yá que la proposición de llei prevista pola coalición caltién el personal llaboral indefiníu de la institución hasta la so xubilación.

Namái Foro sofita de momento esti documentu, lo que reduz a dos opciones l’abanicu pa solucionar la situación de l’ALLA. La primera sería la que defendió nun primer momentu la Conseyería d’Educación y Cultura, esto ye, la creación d’una llei específica pa la institución académica, como fixo la Generalitat Valenciana cola Acadèmia Valenciana de la Llengua, una midida que, sicasí, dilataríase nel tiempu y nun cuenta col apoyu del grupu parllamentariu socialista.

La otra, la más rápida, sería l’aprobación por parte del Conseyu de Gobiernu d’un decretu pola que se modificaren los estatutos de l’ALLA pa qu’afitaren la so naturaleza xurídica pública. Cualquier de les víes manexaes sería bien vista dende la institución académica, que demanda una solución qu’ha de llegar nes dos próximes selmanes.

Otra manera, con respeuto a la otra cuestión pendiente rellativa a esta situación a la que s’enfrenta l’ALLA, esto ye, la renovación del alquiler de la sede, esiste un compromisu verbal por parte de la conseyería pa facese cargu de la mesma, lo que frenaría’l cambiu de llocal que se llegó a plantegar.

Busca de consensu

IX esplicó esta mañana la so postura con respeuto a la situación de l’ALLA, defendiendo que la institución se configure “como una entidá pública d’Asturies, adscrita a la conseyería competente en materia de Cultura, con personalidá propia pal exerciciu de les sos funciones con autonomía orgánica, funcional y presupuestaria, y que’l so personal llaboral indefiníu conserve’l conxuntu de los derechos llaborales activos”. En total, la institución cuenta con dos trabayadores y dos becarios.

“Nun se pue asimilar l’Academia nin a una ONG nin a otres academies que nun tienen funciones de calter públicu, y recuerdo que dende la constitución de l’Autonomía forma parte del so articuláu institucional”, alvirtió’l voceru d’IX, Gaspar Llamazares. “El nuesu oxetivu ye buscar el consensu con tolos grupos, porque l’Academia ye una entidá al serviciu de los asturianos”, añadió Concha Masa, responsable d’Educación del grupu parllamentariu d’IX.

La iniciativa de la coalición, según esplicó Llamazares, significa “mantener el personal de l’Academia, dalgún d’ellos con una antigüedá de 30 años, al traviés d’una alternativa similar a la utilizada con el personal del Hospital Grande Covián” de Les Arriondes.

[Rectificación 30/03/2017: Esta noticia espublizóse nuna primer versión na que se dicía que Podemos nun sofitaba la propuesta por discrepancies cola so política con respeuto al emplegu público en cuenta de dicir que Podemos sofitaba la propuesta anque tenía discrepancies cola política de la mesma con respeuto al emplegu público]