PSOE, Podemos, IX, Foro y C’s apauten una Proposición de Llei pa iguar la situación llegal de l'ALLA

|
PSOE, Podemos, IX, Foro y C’s apauten una Proposición de Llei pa iguar la situación llegal de l'ALLA

En feches prósimes va ser presentada con calter urxente una Proposición de Llei con oxetu de modificar l’artículu 2 de la Llei 5/1997 d’Academies del Principáu d’Asturies que permita la inclusión de l’Academia de la Llingua Asturiana como institución de Derechu Públicu del Principáu d’Asturies.

Esta reforma de la Llei va ser presentada por cinco de los seis grupos de la Xunta, por tanto la so tramitación y aprobación va ser segura. El Partíu Popular nun figura entre los firmanes de la proposición. Esta ausencia "nun ye d'estrañar viendo les últimes declaraciones de los populares al rodiu de la llingua asturiana", afirma la diputada de Podemos Lucía Montejo.

Ana María Cano, presidenta de l’Academia de la Llingua Asturiana (ALLA), afirmó díes atrás na so comparecencia énte la Comisión Especial d’Estudiu sobre Réxime de Proteición y Promoción del Asturianu de la Xunta Xeneral que la situación de la institución “ye crítica”, ya qu'Intervención del Gobiernu pon torgues a la tresferencia corriente a la entidá que vien recibiendo dende la so creación al considerala privada cola normativa actual.

Nun hai una fecha concreta pa la so presentación d'esta modificación de llei ya qu’anguañu ta trabayándose na redacción definitiva de la mesma. Pero al ser de tramitación urxente y de llectura única va ser rápida la so tramitación na Xunta.

El borrador de la proposición espón que “l’Academia de la Llingua Asturiana pola so importancia pal cumplimientu del mandatu conteníu nel artículu del Estatutu d’Autonomía del Principáu d’Asturies ha de ser concebío como una institución de Derechu Públicu del Principáu d’Asturies porque tien encomendaes pol Decretu d’aprobación de los sos estatutos importantes funciones públiques venceyaes col so ámbitu d’actuación, como fixar la norma llingüística del asturianu, la tutela llingüística, la emisiones de dictámentes y asesoramientu, y el siguimientu de programes, ente otres, funciones toes elles que suponen la esistencia d’actuación alministrativa y exerciciu de funciones públiques”. Amás, apunta que la institución académica foi creada “por alcuerdu del Conseyu de Gobiernu del Principáu d’Asturies mediante decretu”, lo qu’aconseya “esclariar la so naturaleza xurídica nel sentíu descritu”.

Por ello, los cincos grupos parllamentarios que sofiten esta proposición apuesten pola inclusión d’un artículo nuevu na Llei del Principáu d’Asturies 5/1997, del 18 de payares, d'Academies qu’afite esta circunstancia y qu’evite que l’ALLA sía considerada como una entidá privada na so rellación col Gobiernu. D’igual forma, añádese una disposición adicional que garantiza la conservación de los sos derechos al personal llaboral indefiníu contratáu pola institución y qu’establez que’l personal nuevu contratáu nun futuru será en “conformidá cola disposiciones xenerales vixentes en materia de personal de l’Alministración del Principáu d’Asturies”.

Lucía Montejo, diputada de Podemos, apunta qu’esta vía ye la que consideren más eficaz y urxente pa iguar la situación actual de l’ALLA, pa que yá posteriormente pueda redactase una Llei específica pa l’Academia.

Contador Estadistiques