Noreña va aprobar tamién una moción de sofitu a la oficialidá

|
Casa Conceyu Noreña

Cuatro de los seis grupos municipales del Conceyu de Noreña van aprobar el xueves 30 en Plenu una moción de sofitu a la oficialidá qu’insta al Gobiernu y a la Xunta Xeneral a entamar la reforma l’Estatutu nesta llexislatura. El PSOE, al igual que’l PP, astúvose nes Comisiones Informatives que se celebraron na mañana del xueves.

El documentu, presentáu por Conceyu Abiertu por Noreña, Independientes por Noreña, Izquierda Xunida (IX) y Foro, ye similar al aprobáu la selmana pasada n’Avilés, anque nesti casu marca una fecha pa entamar la reforma del Estatutu: “nesta llexislatura”. Ye nel puntu 2, que’l PSOE solicitó retirar esta mañana nes Comisiones Informatives del Conceyu de Noreña p’apoyar la proposición d’alcuerdu sobre la oficialidá.

En concreto, “insta al Gobiernu d'Asturies y a les distintes fuercies polítiques conrepresentación parllamentaria a entamar un procesu de diálogu y consensu cola fin d'algamar esti oxetivu nesta llexislatura, principiando los trámites necesarios pa la reforma del Estatutu d'Autonomía d'Asturies nun procesu que termine incluyendo nel mesmu la oficialidá de la llingua asturiana”. Los socialistes, que se basen nos argumentos daos pol Gobiernu pese a la postura nueva de la FSA con respeuto al idioma tres el congresu últimu, sí sofiten el puntu 1, que diz que “ye'l momentu d'avanzar na oficialidá del asturianu como elementu fundamental pa la so dignificación normativa y la so normalización social”, dalgo mui similar al que sí apoyó’l PSOE en Xixón.

El xueves próximu, a les 19 hores, va celebrase’l Plenu nel que se va votar y aprobar esta moción, yá que los cuatro grupos que la presenten sumen 9 de los 13 conceyales. Los 3 ediles del PSOE astendránse de manera previsible, polo que la dulda quedaría na postura que cultuviera la del PP.

D’esta forma, Noreña súmase a la llista de conceyos, liderada por Uviéu, Xixón y Avilés, que amusen el so sofitu a la cooficialidá del asturianu y gallego-asturiano.

Contador Estadistiques