El Conceyu d’Avilés súmase a Xixón y Uviéu nel sofitu a la oficialidá del idioma

|
Plenu d'Avilés 16 de payares

Los trés conceyos con más habitantes del país, que representen casi’l 70 por cientu de la población asturiana, sofiten la oficialidá. L’Ayuntamientu d’Avilés aprobó esti xueves una moción al respeuto, colos votos favorables del PSOE, y súmase asina a Xixón y Uviéu.

Somos Avilés, Izquierda Xunida (IX) y Ganemos Avilés foron los responsables de llevar a Plenu esta proposición qu’apuntaba que “ye'l momentu d'avanzar na oficialidá del asturianu como elementu fundamental pa la so dignificación normativa y la so normalización social” y, “nesti sen, insta al Gobiernu d'Asturies y a les distintes fuercies polítiques con representación parllamentaria a entamar un diálogu y llograr un consensu col fin d'algamar esti oxetivu, qu'acabaría cola reforma del Estatutu d'Autonomía d'Asturies nun procesu qu'incluya nel mesmu la oficialidá de la llingua asturiana”. Tres aldericase, llevóse alantre la votación, que foi apoyada tal cual, ensin modificación nenguna, polos 8 conceyales socialistes, sumando un total de 17 votos a favor y 8 en contra.

Namái’l Partido Popular (PP) y Ciudadanos posicionáronse a la escontra d’esta moción, asemeyada a la que la selmana pasada aprobó’l Plenu de Xixón, tamién colos votos contrarios de la derecha, anque col apoyu de Foro, partíu de gobiernu na villa de Xovellanos. Nesti casu, presentada por Xixón Sí Puede y IX, la moción tuvo una enmienda socialista aceptada polos dos grupos d’izquierda que pidía avanzar hacia la oficialidá pero ensin afitar un calendariu específicu.

N’Uviéu, el tripartitu formáu por PSOE, Somos Oviedo y IX tamién amosó’l so sofitu a la oficialidá. D’esta forma, los trés conceyos que representen casi un 70 por cientu de la población asturiana posiciónense a favor de la equiparación de los derechos llingüísticos de los falantes de llingua asturiana y gallego-asturiano, esfarrapando asina los argumentos de dellos sectores contrarios a la cooficialidá que falen d’una ausencia de demanda social.

Contador Estadistiques