Ḷḷena, Noreña y Castrillón súmense a la llista de conceyos que sofiten la oficialidá del asturianu

|
Plenu de L.lena

Los Plenos de Ḷḷena, Noreña y Castrillón, nestos dos casos últimos cola astención del PSOE, aprobaron una moción de sofitu a la oficialidá qu’insta al Gobiernu y a la Xunta a entamar la reforma l’Estatutu. Asina súmense a Mieres, Xixón, Uviéu y Avilés, que recién tamién se posicionaron a favor d'esta demanda.

Compromisu por Ḷḷena presentó una proposición d’alcuerdu sobre la oficialidá de la llingua asturiana na próxima reforma del Estatutu d’Autonomía que siguía’l modelu de Somos Avilés, Izquierda Xunida (IX) y Ganemos Avilés aprobada nesta ciudá col sofitu del PSOE. Ésta apunta que “ye'l momentu d'avanzar na oficialidá del asturianu como elementu fundamental pa la so dignificación normativa y la so normalización social” y, “nesti sen, insta al Gobiernu d'Asturies y a les distintes fuercies polítiques con representación parllamentaria a entamar un diálogu y llograr un consensu col fin d'algamar esti oxetivu, qu'acabaría cola reforma del Estatutu d'Autonomía d'Asturies nun procesu qu'incluya nel mesmu la oficialidá de la llingua asturiana”.

Nella nun fala de plazos, yá que “l’oxetivu yera sumar el votu favoratible del PSOE”, apunta Agripino Pérez Acebal. Asina, La propuesta salió alantre col apoyu d’IX y PSOE, algamando un total de 15 votos a favor y dos en contra, los del PP.

Noreña apuesta por avanzar “nesta llexislatura”

Conceyu Abiertu por Noreña, Independientes por Noreña, IX y Foro rexistaron, mentes, una moción na mesmas llinia na que s’incluyíu nel puntu 2 les pallabres “nesta llexislatura”, dalgo que nun convencía al PSOE llocal. “Pidiéronnos la retirada del puntu 2 porque dicen apostar por ello a partir del 2019, pero nun creímos conveniente facelo porque, a parte de tener sólo dos puntos, la propuesta perdería la so razón de ser”, esplica Pablo Pérez Fonseca, conceyal de la candidatura de xunidá popular.

Al tar ausente dos de los trés ediles socialistes, el sofitu a la oficialidá por parte del Plenu salió alantre con 9 votos a favor, una astención y uno en contra, el del PP. La conceyala popular astuviérase la selmana pasada nes Comisiones Informatives.

Pal PP de Castrillón, los asturfalantes son aldeanos

IX y Castrillón Sí Puede defendieron en Castrillón la proposición d'alcuerdu sobre la oficialidá del asturianu, que contó cola astención del PSOE pol mesmu motivu qu'en Noreña. Sicasí, la polémica protagonizó esti Plenu, pola postura del PP de fobia al idioma, llegando a afirmar que por falar asturianu pueden confundite con un aldeanu.

Na semeya, el Plenu celebráu ayeri en Ḷḷena

Contador Estadistiques