“Nel FIG de Villaviciosa’l públicu pue atopar coses que nun se ven en tolos festivales”, apunta Muñiz

Con un cambiu obligáu d’última hora por decisión del Conceyu de Villaviciosa que lleva a treslladar de L’Ancho a El Pelambre les actividaes principales, arranca esti xueves el XVI Festival Internacional de la Gaita (FIG). 16 agrupaciones y 150 músicos van participar hasta’l domingu nun certame nel que, como diz el so coorganizador David Muñiz, “el públicu pue atopar coses que nun se ven en tolos festivales”.

Un pasucais de la Banda Gaites Villaviciosa-El Gaitero, entamadora del FIG, va abrir a les 20 hores esta edición, anque enantes, a les 18 hores, va inaugurase ún de los atracivos d’esti añu, la esposición ‘Asturies n’otra dómina: la ropa’, con traxes tradicionales asturianos de la coleición del Grupu de Baille Tradicional San Félix de Candás, que se va poder visitar hasta’l domingu na segunda planta de la Casa de los Hevia nos horarios siguientes: de 18 a 20 hores, güei y mañana; y de 12 a 14 y de 16.30 a 18.30 hores, sábadu y domingu. Onde va finar el desfile de l’agrupación llocal, el Teatru Riera, va tener llugar a les 21 hores un conciertu de Llau, banda formada por Dani Álvarez, Lisardo Prieto y Luís Nicolás.

“Esta edición preséntase mui guapa. Son 16 grupos y 150 músicos con propuestes mui interesantes”, apunta Muñiz. Ente elles, por novedosa, rescampla la de los sardos Cuncordia a Launeddas, convidada pa esti FIG xunto cola Escuela de Folclore de Zamora; la gallega Escola de Gaitas de Ortigueira; y la berciana Banda de Gaitas Castro Bérgidum.

La carpa del festival, asitiada finalmente n’El Pelambre, va acoyer mañana a les 21.30 hores la VII Nueche en Danza del FIG, con Les Xeitines, la Orquestina La Xarangana y el Grupu de Baille Tradicional San Félix. Y el sábadu la siempre esperada Nueche Folk, dende les 21 hores, qu’esti añu va contar cola presencia de los mozos Alienda, los escoceses Project Smok, los llexendarios Llan de Cubel y un conciertu únicu, especial pal festival, el del tríu asturandaluz Deira en compañía del gaiteru Borja Baragaño.

“Nel FIG de Villaviciosa’l públicu pue atopar coses que nun se ven en tolos festivales, coses diferentes y estremaes”, apunta Muñiz, que destaca l’apoyu de maliayes y maliayos al certame, con un gran ambiente en toles actividaes. Un sofitu que tamién se materializó n’apoyu económicu, yá que la campaña de micromecenalgu na rede na plataforma Verkami con material del FIG pa financiar el festival recaudó 1.762 euros –l’oxetivu yeren 1.500– y los comercios de La Villa participen activamente de cara a la cestona que se va sortiar el llunes.

El certame complétase con otres munches actividaes, como talleres, l’alcuentru de bandes de gaites del sábadu a les 18 hores na carpa d’El Pelambre; el VI Certame de Canción Asturiana Xavi Solares con Celestino Rozada, Águeda Riera, Manuel Roza y Néstor Díaz, con Valentín Fuente a la gaita, el domingu a les 18 hores na carpa; o’l XIII Concursu de Gaiteros y Gaiteres Memorial José Huerta, el domingu a les 19 hores na plaza L’Españadal. Munchos motivos p’averase estos díes a Villaviciosa a disfrutar de la gaita y la tradición.

Na imaxe, un fotograma del videu promocional d'esta edición del FIG.