El XVII FIG de Villaviciosa, que refuerza l'equipu organizador, yá tien fecha: del 5 al 8 de setiembre

La Banda Gaites Villaviciosa-El Gaitero yá ta trabayando na decimoséptima edición del Festival Internacional de la Gaita (FIG), que se va celebrar del 5 al 8 de setiembre. Col enfotu de siguir col crecimientu d’estos años, el certame anuncia la incorporación definitiva al equipu organizador de persones venceyaes a la música tradicional que veníen collaborando de forma puntual hasta'l momentu.

L’arranque del mes de setiembre ye en Villaviciosa de gaita y música tradicional. La celebración de FIG permite disfrutar a llocales y visitantes d’actuaciones d’agrupaciones de dientro y fuera d’Asturies asina como de grupos folk de primer nivel y otres munches actividaes.

La edición del 2024 nun va quedar atrás. La organización ta acabante d’anunciar les feches de celebración apautaes col Conceyu, que sigue siendo’l sofitu principal del festival, y del so enfotu en “volver a iguar un programa d’actividaes lo más ampliu y atractivu posible” ente’l 5 y el 8 de setiembre.

“De fechu, la principal novedá qu’hai pel momentu ye que pa esti añu qu’entra nun sólo cuenta col personal organizador de siempre, sinón que ta acabante d’incorporar de manera definitiva al so equipu de trabayu a xente venceyao al mundu de la música tradicional que yá venía andechando puntualmente, col enfotu de siguir medrando”, apunten. Un pasu pa siguir consolidando un festival que s’asitia ente los principales del país.

Ésitu de públicu nesti 2023

Esti añu pel FIG pasaron agrupaciones de Sardegna, Galicia, Zamora y El Bierzu; grupos folk como Alienda o Llan de Cubel, amás de los asturandaluces Deira en compañía del gaiteru Borja Baragaño y los escoceses Project Smok. Tamién s’entamó una esposición sobre’l traxe tradicional asturianu, una mercáu agroalimentariu y artesanu, una Nueche en Danza, actuaciones de bandines de música tradicional pelos chigres, un certame d’asturianada y un concursu de gaita, actividaes que nel so conxuntu permitieron al certame “dar un reblagu importante en cuantu a cantidá y calidá de la programación y asistencia de públicu”, algamando los 6.000 espectadores.