El FIG de Villaviciosa entama una campaña de micromecenalgu pa potenciar el certame

El XVI Festival Internacional de la Gaita va celebrase los díes 31 d'agostu y 1, 2 y 3 de setiembre con un importante programa que saca otra vuelta los conciertos a la cai.

Llan de Cubel, Alienda, Deira & Borja Baragaño, Llau y los escoceses Project Smok son dalgunes de les formaciones que van tocar nesta edición del FIG, que dexa atrás el formatu pequeñu col que sobrevivió mientres los años de restricciones sanitaries y el pasáu pa recuperar l'actividá previa a la pandemia. Asina, la plaza Xosé Caveda y Nava va acoyer la Nueche Folk del sábadu y, amás de nel Teatru Riera, va haber actividaes na Casa de los Hevia, na plaza'l Güevu, la plaza L'Españadal, l'Atenéu Obreru y nuna carpa en L'Ancho.

No que respeuta a les agrupaciones participantes, l'anfitriona Banda de Gaites Villaviciosa-El Gaitero convida pa esta edición a la Escuela de Folclore de Zamora; la gallega Escola de Gaita de Ortigueira; la berciana Banda de Gaitas Castro Bérgidum; y la sarda Cuncordia a Launeddas. Amás, tán previstes charres, esposiciones, un mercáu artesanu y ecolóxicu, un alcuentru de luthiers, certame de tonada, un concursu de gaiteros solistas y una Nueche en Danza, el vienres, con Les Xeitines, La Xaragana y el Grupu de Baille Tradicional San Félix de Candás.

Pa financiar esti esfuerciu organizativu, los entamadores del FIG tien en marcha una campaña de micromecenalgu na rede na plataforma Verkami col oxetivu de recaudar 1.500 euros, de los que, a falta de 11 díes, yá algamaron el 81 por cientu, un total de 1.224 euros. Pa ello tienen en venta el vasu del festival, la bolsa de tela, la camiseta y un paquete de productos qu'inclúi estos productos amás d'una chapa, pegatina y una cerveza.