El tríu asturbretón Muga va estrenase n’Asturies nel Arcu Atlánticu

|
Muga

Depués de rodase per dellos puntos del Estáu francés, l’espectáculu ‘Chants de femmes des Asturies’ de Muga, tríu con componentes asturianos y bretones asentáu n’An Oriant, prepara’l so desembarcu n’Asturies. Va ser nel Festival Arcu Atlánticu, qu’esti añu va centrase na visibilidá de les muyeres na música, el deporte y la cultura.

Nesi perfil encaxa dafechu la propuesta de Muga, formación que trabaya col patrimoniu de voz femenina n’Asturies y que tien como cantante a Clara Diez Márquez, tamién encargada de la pandereta y el panderu. Xunto a ella, Martin Chapron y Thomas Felder, dos músicos bretones que creen testures sonores a partir de les guitarres y el violín, de manera respeutiva.

La oportunidá de disfrutar d’esta iniciativa musical que podría definise col términu francés ‘brut’, “que nun tien traducción esauta n'español o asturianu, pero'l significau va na llinia de lo arcaicu, auténticu, fuerte y brutal”, en pallabres de Diez, va ser el vienres 26 a les 20.30 hores nel patiu del Centru de Cultura Antiguu Institutu, dientro de la programación del Arcu Atlánticu. Nél va participar Pablo Texón, collaborador del grupu, recitando los rellatos sobre la muyer asturiana qu'escribió pal espectáculu.

En principio, si nun hai novedá, va ser la única actuación de Muga n’Asturies nestos meses dientro la xira que tien en marcha y que va llevalu a festivales europeos importantes. Asina, ‘Chants de femmes des Asturies’ va aportar el xueves a Les Suds à Arlés, festival d’esta población de Provença consideráu ún de los más destacao centraos en músiques del mundu, y el 21 nel Les Vieilles Charrues, en Breizh, el que más públicu axunta en Francia, con una afluencia de 280.000 persones en 4 díes, y nel que participen grupos y artistes de la popularidá de Black Eyed Peas, Iggy Pop y Skunk Anansie o los DJ David Guetta y Martin Garrix.

Depués del so pasu per Asturies, Muga tien zarraes feches n’agostu en Catalunya, nel Trama Festival (el 12 en Bellver de Cerdanya), y, yá en Francia, en Les Jeudis de Musiques del Monde (22 en Liyon). Nun podía faltar la so presencia nel Festival Interceltique de Lorient, nel chigre d’Asturies el día 9.

Posible edición cabera del Arcu Atlánticu

El Festival Arcu Atlánticu va vivir la so octava edición, y posiblemente la cabera si’l PSOE nun cambia la so idea al respueto d’esti certame creáu por Foro por iniciativa de Carlos Rubiera p’averar a Asturies la música y cultura de los pueblos atlánticos, texendo llazos ente ellos, y amosar lo propio, del 23 al 28 d’esti mes en Xixón. Nesta ocasión la programación va centrase na igualdá de xéneru, pretendiendo dar visibilidá a les muyeres na música, el deporte y la cultura.

Ente les actuaciones previstes destaquen, amás de la de Muga, la de Muyeres, que van llevar una edición especial del so espectáculu ‘País malva’ a la Plaza Mayor (22 hores) na xornada inaugural cola presencia de Marisa Valle Roso, Morgane Le Cuff (Breizh), Vanesa Muela (Castilla), Tanxugueiras (Galicia) y Las Çarandas (Portugal). El miércoles va ser el turnu de La Mal Coiffée, que va permitir sentir l’occitanu n’Asturies; el xueves, de l’asturiana B-Linda; el vienres, d’Anabel Santiago; el sábadu, de L-R cola propuesta ‘Amigues’ na que van participar Valle Roso, Mapi Quintana, Andrea Joglar, Merce Santos, Silvia Quesada, Marga Lorences, Eva Tejedor, y 6 Riales, amás de Prau Llerón con bailles a pie de cai; y el domingu, cola Banda de Música de Xixón.

Semeya obra de Cédric Raylet.

Contador Estadistiques