Militantes de los dos sectores conformen el grupu que quier llevar l’alderique de la oficialidá al congresu de la FSA

|
Socialistes pola Oficialidá allargada

Esti miércoles va presentase n’Uviéu’l manifiestu de ‘Socialistes pola Oficialidá’, coleutivu de militantes que va presentar una enmienda a la ponencia marcu del congresu de la FSA pa llevar l’alderique de la oficialidá al mesmu. Ésti ta compuestu por persones tanto del sector de José María Pérez López como d’Adrián Barbón.

L’actu va tener llugar a les 13.15 hores na Casa’l Pueblu y pretende ser l’aniciu d’una campaña pública p’algamar el mayor consensu posible dientro del partíu y ente la sociedá asturiana al rodiu de la oficialidá de la llingua asturiana y gallego-asturiano de cara al congresu de la FSA que va celebrase los díes 29 y 30 de setiembre, y el 1 d’ochobre. Esti piñu de militantes va presentar una enmienda a un puntu de la estaya ‘Promoción de la lengua asturiana’ pa incluyir nella la oficialidá con un modelu propiu y una implantación de manera progresiva nuna futura reforma del Estatutu d’Autonomía.

Ye de destacar el fechu de qu’esti coleutivu sía tresversal, con xente de los dos sectores principales del partíu. Tanto Barbón, que yá lo dixo públicamente, como Pérez López, tán abiertos al diálogu, anque entovía nun se pronunciaron sobre cuála ye la so postura sobre la oficialidá del idioma.

Alderique d’apertura de la campaña a la secretaría xeneral

Esta tarde, a les 18.30 hores na Casa’l Pueblu d’Uviéu, los dos candidatos a la sectretaría xeneral de la FSA van protagonizar un alderique que va servir p’abrir la campaña. Va ser ensin públicu, emitíu en direuto per TPA y nel canal de YouTube de la organización, y nél van tratase trés temátiques: economía, política social y modelu de partíu.   

Contador Estadistiques