Empiecen los contautos pa llevar l’alderique del asturianu y la so oficialidá al congresu de la FSA

|
Maricuela con Inaciu Galán

La esistencia de militantes socialistes favoratibles a llevar l’alderique de la oficialidá al congresu de la FSA, previstu pa finales de mes, lleva a los coleutivos en defensa del idioma a trabayar p’algamar un consensu nesi sen. Iniciativa pol Asturianu aconceyó con representantes de dalgunes agrupaciones el llunes.

La socialista Ángeles Flórez Peón ‘Maricuela’ anunció esti alcuentru en redes sociales xunto con una semeya col presidente de la organización, Inaciu Galán. La razón del mesmu ye sumar apoyos pa facer posible esti alderique al que nun zarró puertes Adrián Barbón, ún de los candidatos a la secretaría xeneral de la Federación Socialista Asturiana (FSA), en declaraciones feches el mes pasáu. Tamién dende la Xunta pola Defensa de la Llingua Asturiana ta siguiéndose atentamente el procesu precongresual y calteniendo dellos contactos que dende la organización quieren más nun concretar por prudencia.

La ponencia marcu del trentenu segundu congresu de la organización, previstu pal 29 y 30 de setiembre, y el 1 d’ochobre n’Uviéu, que redautó la direición saliente, nun incluyó la oficialidá na so estaya ‘Promoción de la llingua asturiana’ y ye continuista con respectu a la política que lleva siguiendo'l PSOE n'Asturies nes últimes lexistaltures.

Militantes y agrupaciones pueden presentar enmiendes hasta’l 27 de setiembre y dende los colectivos de defensa del idioma dase por supuesto que delles tarán na llinia de meyorar la situación que plantega la ponencia-marcu. La gran incognita ye si dalguna d'elles va dir nel sen de que la FSA dea por fin el pasu de defender la oficialidá del asturianu y, si ye asina, si pue algamar un apoyu mayoritariu.

Congresu de 2008

Nel Congresu de la FSA en 2008 delles agrupaciones defenderon la oficialidá del asturianu, ente elles Xixón, Nava, La Ribera, Uviéu y Cangues, y la so propuesta foi derrotada por un marxe pequeñu tres grandes presiones pela parte de la dirección del partíu.

 

Contador Estadistiques