Mil persones reclamen cárcel inmediata pa los condenaos na sentencia del 'Casu Marea'

OCAN inició la recoyida de firmes el xueves pasáu y va allargala na so web hasta'l vienres.

"Firma para que José Luis Riopedre y el restu de los condenaos pola macro-trama de corrupción del Gobiernu d'Areces, el 'Casu Marea', ingresen en prisión d'inmediato, cumpliendo asin la sentencia xudicial y demostrando que, por fin, termina la impunidá de los corruptos n'Asturies", reza la cabecera de la ficha na que rellenar los datos pa sofitar la campaña entamada pol Observatoriu Ciudadanu Anticorrupción d’Asturies (OCAN). Ésta esixe nome, apellíos, corréu electrónicu, conceyu y profesión.

La postura del presidente de Javier Fernández énte la sentencia anunciada'l día 1 foi criticada por OCAN: "nun ye normal que'l que representa a tolos asturianos y asturianes nun esixa cárcel inmediata pa los que robaron 15 millones d'euros a la ciudadanía, que se teníen que destinar a la meyora de la Educación asturiana nun periodu nel que munchos de los nuesos fíos y fíes tuvieron acudiendo a clase en barracones, una situación que ye indignante". Tamién llamenta qu'Adrián Barbón, secretariu xeneral nuevu de la Federación Socialista Asturiana (FSA), nun se posicionara entovía al respeuto y que nun pidiera responsabilidaes polítiques a Vicente Álvarez Areces, al igual que'l so rival nes primaries José María Pérez.

Nel momentu de la redaición d'esta noticia, el pidimientu d'OCAN llevara 1.012 firmes, cantidá que s'espera qu'aumente nos díes próximos. "Énte ls presiones que los condenaos y el so entorno exercen pa quedar en llibertá, namái la presión de la sociedá civil podrá consiguir que se cumplan les penes", afirmen.