Condena de seis años de cárcel pa Iglesias Riopedre pol ‘Casu Marea’

Esti vienres diose a conocer la sentencia del ‘Casu Marea’ por corrupción na Alministración asturiana. Siete son los condenaos con pena de cárcel, destacando los 6 años pal ex conseyeru d’Educación y Ciencia José Luis Iglesias Riopedre y los 9 y mediu –la más alta– pa María Jesús Otero, ex direutora xeneral n’Educación.

El primeru ye culpable de delitos continuaos de prevaricación, falsedá en documentu mercantil, fraude a l’alministración y confechu, y ha d’abonar tamién una multa de 400.000 euros, mientres que la segunda, por confechu, con multa de 2.500.000 euros. La funcionaria Marta Renedo, persona pola que se desatapó la trama y acusada de llevar 2 millones d’euros, tien una condena de 9 años y una multa de 480.000 euros.

Los otros condenaos son Alfonso Carlos Sánchez, ex propietariu d’APSA (6 años y 6 meses, y 1.900.000 euros); Victor Manuel Muñiz, ex xerente d’Igrafo (6 años y 6 meses, y 1.500.000 euros); Maximino Fernández, d’Asac Comunicaciones (1 añu y 9 meses); y Antonio Azoría, de Nora (1 añu y 9 meses). Francisco Javier Juárez, trabayador del Conceyu de Mieres, ha de pagar una multa, mentes que Paz Pendás, Isaac Ovies, José Villa, Braulio Iglesias y José Blanco, resultaron absueltos.

Esta sentencia llega 7 años depués de que s’iniciaren les investigaciones tres una denuncia d’una muyer que se decató de que taben suplantando la so identidá pa xestionar una cuenta que contaba con casi 100.000 euros, delitu que cometía Renedo. A partir d’ehí foi desatapándose una trama de corrupción qu’afeutó a ex altos cargos de l’Alministración asturiana, funcionarios y empresarios.