Mieres aprueba la ordenanza d’asturianu cola oposición única del PP

El PSOE y Somos Mieres sofitaron l’ordenanza d’asturianu del Conceyu de Mieres presentada por Izquierda Xunida (IX), que salió alantre col votu en contra del PP, qu’anunció alegaciones. “Ye’l primer pasín de los munchos qu’hai que dar”, afirma l’edil d’Izquierda Asturiana (IAS), nel gobiernu, Faustino Zapico.

La dulda del Plenu celebráu güei yera la posición final del PP, que na Comisión de Cultura onde s’aprobó’l borrador exerciera’l so derechu de reserva de votu. Finalmente, ésti foi en contra, con anuncies por parte de Fernando Pintuales de presentación d’alegaciones al testu, al que tacha d’anticonstitucional al entender que fai al asturianu oficial nel conceyu.

La ordenanza d’asturianu de Mieres ta basada na de Ḷḷena “porque consideramos que yera la que más garantíes xurídiques tenía”, apunta Zapico, y adaptada a les necesidaes de Mieres. Nel Plenu salió alantre por 17 votos a favor por 3 en contra –ausentóse Delia Campomanes, de baxa por maternidá–, y agora’l testu va pasar a un periodu d’esposición pública de 30 díes enantes de la so aprobación definitiva.

“Ye’l primer pasín de los munchos qu’hai que dar”, asegura l’edil d’IAS, qu’apunta como siguiente oxetivu “dar cobertoria tol añu al serviciu de normalización llingüística”. Darréu la mira va tar na redaición d’un Plan de Normalización Llingüística.