IAS acusa al PP de Mieres de mentir “a costafecha” sobre la ordenanza d’asturianu

La direición nacional d’Izquierda Asturiana (IAS) llama al PP de Mieres a “dexar d'enredar” cola ordenanza d’asturianu aprobada nel Plenu del xueves pa nun “retrasar lo que ye inevitable”. La formación que participa nel gobiernu municipal d’Izquierda Xunida (IX) acusa a los populares de mentir “a costafecha”.

“L'argumentariu usáu pola derecha mierense pa oponese a unes ordenances que reconocen el derechu de los vecinos a dirixise al conceyu n'asturianu, y que quieren ser marcu llegal pa una política de normalización efectiva, fueron de lo más peculiar: que yeren anticonstitucionales, yá que suponíen una oficialización del asturianu en Mieres y eso namás podía facese col Estatutu d'autonomía, y que yeren illegales porque nun incluyíen memoria económica, polo que diben suponer munchu gastu pal conceyu”, apuenten los nacionalistes, que camiente que los representantes del PP “saben de sobra qu'esos argumentos son radicalmente falsos, polo que namás podemos concluyir que mienten a costafecha”. Asina, espliquen que “les ordenances aprobaes nun tienen que ver cola oficialización del asturianu, porque'l conceyu nun tien capacidá llegal pa facer cosa tala, y en tou casu lo que será illegal ye'l propiu Estatutu asturianu, qu'incumple'l mandáu constitucional de facer oficiales toles llingües nos respectivos estatutos”.

“El PP”, siguen dende IAS, “sabedor de que lo meyor p’acabar col idioma ye facer como que se fai, sigue la llinia histórica de los Gobiernos de los últimos 30 años n’Asturies y tracamundia normalización con propaganda. Eso sí, afirmando ‘que nun tán a la escontra del asturianu’, colo que podemos perafitanos no que dixo'l compañeru Zapico: ‘Ustedes dicen que nun tán a la escontra del asturianu y será verdá. Lo único que tán ye a la escontra de que s'use’”.

Por esti motivu, el partíu republicanu solicita a los populares que, “dao que'l delegáu del Gobiernu ta puestu pol Gobiernu central, del PP”,  dexe “d'enredar nesti tema y retrasar lo que ye inevitable, esto ye, l'avance del procesu de dignificación y normalización de la llingua asturiana, desixencia de la razón y de la xusticia”. Por último, agradecen al restu de grupos, esto ye, PSOE y Somos Mieres, “el so votu favorable a les ordenances y la so participación na ellaboración de les mesmes, apurriendo enmiendes y suxerencies, anque nun dexa d'abultanos estraño que nun tomaren la palabra pa defendeles nel Plenu”.