"Los montes quemaos nun van cambiar d'usu", asegura Barbón

L'INFOPA pasa a situación 0 mientres siguen los llabores de revisión, siguimientu y remate de los focos, toos controlaos o estabilizaos.

Adrián Barbón, llueu de firmar nel despachu de Belarmino Tomás en Presidencia'l decretu de convocatoria de les eleiciones del 28 de mayu, intervieno énte los medios de comunicación p'analizar la situación depués de la fase crítica vivida estos díes poles quemes. "Asturies nun arde, quémenla", insistió'l presidente, qu'afirmó que "naide va tener beneficiu d'esti atentáu ambiental. Volveremos a tener viesca onde había viesca, y volverá a haber árboles onde había árboles. Tardaremos tiempu n'algamalo porque ye verdá que nun hai soluciones milagroses, pero consiguirémoslo".

Sobre los posibles usos especulativu de los terrenos amburaos, aseguró que "los montes quemaos nun van poder cambiar d'usu, nun van poder ser recalificaos nin destinaos a eólicos" y anunció "un plan de choque pa restaurar y recuperar les zones afeutaes, y pa compensar los daños sobre bienes particulares y públicos". Cola reconstrucción como prioridá única, esta selmana evaluaránse los daños y va solicitase la declaración de zona catastrófica y ayudes al Gobiernu estatal, que se sumarán a les direutes que prepara'l Gobiernu.

Cuatro conceyos

Na mañana d'ayeri la conseyera de Presidencia, Rita Camblor, declaró la baxada a situación 0 del Plan Especial de Proteición Civil por Quemes Forestales del Principáu d'Asturies (INFOPA), 24 hores depués del pasu de 2 a 1. Los equipos de desaniciu del fueu trabayen agora na revisión, siguimientu y remate (refrixeración de los puntos calientes) de les quemes, con tolos focos, un total de 6 nestos momentos, controlaos o estabilizaos.

Por quema estabilizada entiéndese aquelles que, ensin sin llegar a tar controlaes, evolucionen dientro de les llinies de control establecíes según les previsiones y llabores d'estinción conducentes a su control. La controlada ye la que se consiguió aisllar y detener el so avance y propagación dientro de les llinies de control.

Les actuaciones anguaño danse nos conceyos d'Allande, Tinéu, Valdés y Villayón, tando na categoría d'estabilizaos el de Viḷḷanueva'l Rañadoriu (Tinéu) y l'entamáu en Foyéu (Tinéu) que llega cuasi hasta la mariña de Valdés.

Na imaxe, la quema estabilizada de Tinéu y Valdés al altor de Barcia na que se pue ver columnes de fumu. Captura d'un videu del 112 Asturies.