Les investigaciones poles quemes permiten identificar a cinco posibles autores

Yá se cursó la denuncia contra estes persones por causar fueos intencionaos, mentes qu'hai otres diez sospechoses. Rexístrense 41 focos activos, de los que 6 presenten dificultaes.

El presidente Adrián Barbón, a la salida de los conceyos del comité asesor y de direición del Plan de Proteición Civil d'Emerxencia por Quemes Forestales del Principáu d'Asturies (INFOPA) celebranos n'El Campo'l Morgal, avanzó "que se van cursar cinco denuncies contra presuntos responsables de dalgunes de les quemes qu'afeutaron a Asturies nos díes últimos". Amás, "ta trabayándose n'otra llinia d'investigación" que señalaría a otres diez, anque nesti casu entovía ta "nuna fase inicial".

El trabayu "coordináu de les Bripes, del cuerpo d'axentes medioambientales que collaboren na investigación y del SEPRONA" permitió los avances, según apuntó'l socialista, qu'esta mañana cifró en 41 los focos activos. "Namái 6 presenten una especial dificultá o ta actuándose'l sobre terrén", informó.

Estes quemes más peligroses danse n'Allande, n'Eilao, en Valdés, en Les Regueres, en Ribeseya y en Teberga. Otra manera, la conseyera de Presidencia, Rita Camblor, decretó la xubida a fase d'emerxencia en situación 1 del INFOPA a les 19.15 hores d'ayeri.

Na semeya, aconceyamientu d'esta mañana n'El Campo'l Morgal.