Los contaxos baxen el martes: 448 casos nuevos

La Conseyería de Salú prorroga 14 díes el zarru perimetral y les restricciones del nivel 4+ n'Uviéu, Llanes, Cangas y Gozón.

La Conseyería de Salú informó de 448 contaxos ayeri. Son 34 menos que'l día anterior –anque se comunicaran nun primer momentu 475, l'actualización final aumentó la cantidá hasta los 482–.

La tasa de positividá baxó tamién al 9,07 por cientu con 6.534 pruebes de diagnósticu d'infeición activa, cuando'l día anterior quedó nun 10,77 por cientu. A 7 díes, el porcentaxe ta nun 10,23 por cientu.

Perdieron la vida cola enfermedá causada pol coronavirus SARS-CoV-2 11 persones, seis homes de 89, 87, 85, 84, 80 y 69 años y cinco muyeres de 99, 98, 91, 89 y 72, de los qu'una vivía en residencia. Dende qu'entamó l'andanciu'l total de muertes asciende yá a 1.553.

Hai hospitalizaos 584 pacientes con confirmación o sospecha de COVID-19, a los qu'hai que sumar 109 que tán na UCI. Son 10 y 7 más que'l llunes, de manera respeutiva.

Ensin les midíes más dures

Uviéu, Llanes, Cangas del Narcea y Gozón van ver prorrogaes per 14 díes les midíes actuales al siguir en nivel d'alerta 4+. La Conseyería de Salú refuga de momento activar les restricciones más dures que viven dende güei Avilés, Castrillón y Corvera, anque van revisase los indicadores a los 7 díes.

Nos trés primeros, poro, van tar vixentes hasta'l 17 de febreru y, nel segundu, hasta'l 18. Otra manera, van entrar a valir mañana en Carreño, tamién hasta'l 17.

Pa consultar la situación de tolos conceyos y les midíes actives en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, control policial pa vixilar el cumplimientu del zarru perimetral n'Uviéu.