Asturies algama la incidencia más alta de tola pandemia

Na xornada rexistráronse 395 contaxos y 6 muertes. Carreño súmase a los 17 conceyos con restricciones de nivel d'alerta 4+.

Esti martes Asturies algamó la incidencia más alta de tola pandemia de COVID-19. L'actualización de la última hora d'ayeri colos datos del día anterior reveló qu'a 14 díes yera de 656 casos cada 100.000 habitantes, superando los 650 del 18 de payares, la mayor de la segunda fola y del andanciu.

Aquella xornada detectárense 458 contaxos, polos 448 d'ayeri, nun momentu de baxada –el récor dábase 5 díes enantes–, al igual que'l que nos atopamos agora depués de, como paez, llegar al picu del tercer envite del coronavirus SARS-CoV-2. Salú rexistró ayeri 395 positivos –los datos oficiales cuenten ún más, 396– con 5.257 pruebes de diagnósticu d'infeición activa, polo que la tasa de positivá asitióse nel 10,46 por cientu.

A 7 díes, la tasa de positividá queda nun 10,12 por cientu. Supón una estabilización depués d'un ascensu continuu, anque'l porcentaxe sigue siendo esmoleciente al doblar el 5 por cientu qu'afita la Organización Mundial de la Salú (OMS) como llende pa tener controlada la pandemia.

Nestes 24 hores últimes hebo que llamentar 6 muertes: cuatro homes de 90, 82, 82 y 55 años y dos muyeres de 94 y 86, de los que dos teníen el so llar en residencia. Yá son 1.560 persones –los datos oficiales contabaliza una más non contabilizada de díes anteriores– les que perdieron la vida nel andanciu.

Hai hospitalizaos 565 pacientes con confirmación o sospecha de COVID-19, 19 menos que'l martes. Mentes, la UCI tien 117 ingresaos, 8 más que'l día anterior.

18 conceyos con restricciones

Carreño convirtióse güei nel decimoctavu conceyu coles midíes de nivel 4+ actives, ente elles el zarru perimetral. D'esta forma acompaña a Grau, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio, Ḷḷena, Ayer, Salas, Valdés y Siero, a los que sumen Avilés, Corvera y Castrillón, con restricciones más dures.

Pa consultar la situación de tolos conceyos y les normes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

6 biltos en residencies

La conseyería detectó ente'l 26 de xineru y el 2 de febreru un total de 6 biltos en residencies de mayores, 5 menos que la selmana anterior. En total contabilizáronse 161 casos nuevos, ente internos y trabayadores.

Les autoridaes sanitaries intervienen cuando se da un primer contaxu, anque se cuenten como biltos cuando hai al menos trés. Nesi sen, nesti periodu confirmaróse casos n'otros 29 centros residenciales de los 270 esistentes nel país.

66 brotos activos

Asturies informó al Ministeriu de Sanidá de la esistencia de 66 biltos activos, 11 más qu'hai dos selmanes, con un total de 1.155 casos. 21 d'ellos detectáronse estos 7 díes últimos, comunica la conseyería.

Na imaxe, gráfica del Observatoriu de la Salú n'Asturies cola evolución de la incidencia acumulada a 14 díes na segunda y tercer fola.