El llunes detectáronse 270 casos nuevos

La tasa de positividá asitióse nun 6,89 por cientu nuna xornada con 8 finaos.

La Conseyería de Salú comunicó 270 contaxos esti llunes, 2 menos que'l domingu. Sicasí, los datos oficiales sumen finalmente 9 más non contabilizaos.

El Serviciu de Salú del Principáu d'Asturies (SESPA) fixó 4.788 pruebes de diagnósticu d'infeición activa, polo que la tasa de positividá asitióse nel 6,89 por cientu. El día anterior foi del 9,63 por cientu, mentes qu'a 7 díes ye del 9 por cientu, cuasi doblando'l 5 por cientu que marca la Organización Mundial de la Salú (OMS) como llende pa tener controlada la pandemia.

Perdieron la vida cola enfermedá causada pol coronavirus SARS-CoV-2 8 persones, seis homes de 93, 91, 90, 86, 81 y 70 años y dos muyeres de 87 y 82, de los qu'ún vivía nuna residencia de mayores. Son yá 1.419 les muertes rexistraes dende qu'entamó l'andanciu.

Hai nestos momentos hospitalizaos 305 pacientes con confirmación o sospecha de COVID-19, 32 más que'l domingu, a los qu'hai que sumar 61 que tán na UCI, 4 menos que'l día anterior.