Los centros de Zarréu y Ḷḷuarca siguen ensin maestru d'asturianu

La plaza del Institutu d'Educación Secundaria Avelina Cerra de Ribeseya yá se cubrió.

Les axudicaciones de profesoráu interín del 31 de xineru permitieron que les alumnes y alumnos matriculaos nesti centru rioseyanu a l'asignatura de Llingua Asturiana pudieran recibir clase d'esta materia cuatro meses depués de qu'echara a andar el cursu. Sicasí, quedaron vacíes les del CPEB de Zarréu y del IES Carmen y Severo Ochoa de Ḷḷuarca, polo qu'estos escolinos que yá perdieron mediu añu siguen ensin maestru viendo asina "conculcáu’l so llexítimu derechu" a recibir clases d'asturinu "como consecuencia de una falta planificación alministrativa", denuncia'l Sindicatu Unitariu y Autónomu de Trabayadores de la Enseñanza d'Asturies (SUATEA).

"Magar qu’esisten llistes y bolses con profesoráu d’esta especialidá (la última bolsa acaba constituyise con diez persones), les places nun son escoyíes. Ello débese a que les persones que les constitúin yá tán trabayando per otres especialidaes, tienen perspeutiva de garrar places más cerca casa (el 80 por cientu la población asturiana concéntrase nel centru d’Asturies y, polo tanto, col profesoráu pasa lo mesmo) o, fundamentalmente, porque les places ufiertaes son a media xornada amás de tar lloñe de la so residencia. Esto último trai como consecuencia unos gastos de tresporte, manutención y residencia que malpenes son a pagase col sueldu recibíu", espliquen dende'l sindicatu.

Otru factor que fai entender esta situación ye que'l profesoráu de Secundaria que nun tien el Grau de Filoloxía con Minor en Llingua Asturiana tien de cursar el máster universitariu en Formación del Profesoráu d’ESO, Bachilleratu y Formación Profesional, y elixir les asignatures de llingua asturiana pa poder dar clase d’asturianu. "Anguaño, cada añu sólo salen 5 places d’esti máster, lo que torga enforma l’habilitación de más profesoráu", añaden dende SUATEA.

Poro, el sindicatu educativu reclama aumentar el númeru de places pal máster, potenciar el Minor y la Mención del Grau de Maestros, reconocer la especialidá docente y planificar "les necesidaes educatives de les zones rurales d’esta asignatura y otres en toles especialidaes pa que les places seyan a xornada completa", amás de "ufiertar estabilidá a tol profesoráu interino de los centros rurales con contratos de llarga duración, lo que valdría pa tener plantiyes estables nesos centros".

Na imaxe, el CPEB de Zarréu. Semeya perteneciente al blogue d'Educastur de Zarréu.