Los alumnos de trés centros de Secundaria nun reciben clase d’asturianu pola falta de maestru

|
IES Avelino Cerra

Cuatro meses depués del comienzu del cursu, los alumnos de trés centros de Secundaria de Zarréu, Ribeseya y Ḷḷuarca matriculaos en Llingua Asturiana nun recibieron clase nenguna de la materia. La razón ye la falta de maestru, según denuncia’l Sindicatu d’Enseñanza de Comisiones Obreres (CC OO) d’Asturies.

En concreto’l CPEB de Zarréu, l’IES Avelina Cerra de Ribeseya y l’IES Carmen y Severo Ochoa de Ḷḷuarca son los centros onde tovía nun se cubrieron les places de Llingua Asturiana. Esta falta de profesoráu que vive’l sistema educativu asturianu trátase de “una situación que yá se detectó a finales del cursu pasáu cuando se vio la dificultá pa realizar sustituciones y qu’esti cursu va a peor”.

N’ochobre yeren seis los centros que nun contaben con maestru d’asturianu, situación que llevó al sindicatu a solicitar una reunión con Fernando Padilla, direutor xeneral de Planificación Llingüística y Normalización, na que tamién se trató la cuestión de la especialidá docente de Llingua Asturiana y Gallego-asturiano. “L’apertura de la bolsa, a la que s’apuntaron 10 profesores con habilitación pa dar clase de Llingua Asturiana, nun valió pa solucionar el problema, yá que tovía queden centros ensin docente”, apunten dende CC OO, situación que se fundamenta en que “una parte de les persones que s’apunten a estes bolses fáenlo por previsión, porque pueden tar dando clase d’otra materia”.

El raigañu del problema

La estaya d’educación de CC OO considera que la falta de maestros tien orixe nel “problema de planificación qu’afecta a la formación inicial del profesoráu de Llingua Asturiana na Universidá d’Uviéu”. Asina, señala que dende la entrada de la reforma universitaria de Bolonia, que provocó la estinción de los títulos propios de Filoloxía Asturiana, ye escasu’l “númberu d’estudiantes que se tán formando pa dar clase d’esta materia”.

Poro, “necesítense soluciones urxentes, como la promoción de los estudios rellacionaos cola Filoloxía Asturiana (Minor d’Asturianu en dellos graos de Filoloxía o Llingües Modernes y Mención d’Asturianu nel Grau d’Educación Primaria) y l’aumentu del cupu d’estudiantes de la especialidá d’Asturianu del Máster de Profesoráu de Secundaria (actualmente reducíu a 5), que supón otra vía pa llograr l’habilitación”. D’igual forma, recuerda “les condiciones llaborales del profesoráu de Llingua Asturiana, qu’al nun tar reconocida la especialidá docente nun tien la posibilidá de presentase a oposiciones y, amás, trabaya en más d’un 80 por cientu de los casos a media xornada, influye de forma patente pa que nun se cubran les places”.

Na semeya, l'IES Avelino Cerra, ún de los centros afeutaos.

Contador Estadistiques