Siguen medrando les medies xornaes ente los maestros d’asturianu y gallego-asturiano: 85 por cientu esti cursu

Les medies xornaes ente’l profesoráu de Llingua Asturiana y Gallego-asturiano pasaron d’un 69 por cientu nel 2015 a un 85 por cientu nel cursu que ta acabante d’arrancar. SUATEA denuncia la falta d’ufierta de la materia n’Infantil y l’ausencia de maestros nel ales del país nos institutos pola precariedá llaboral.

“Entama un nuevu cursu escolar y el profesoráu de Llingua Asturiana y Gallego-asturiano sigue sufriendo otru añu más la precarización nel so puestu de trabayu. Cuasi la totalidá  ye profesoráu interino y na primera axudicación asignáronse-y puestos a media xornada (85 por cientu de los totales), en munchos casos itinerantes” apunten dende’l sindicatu educativu. Esta cifra supón un aumentu con respeuto al cursu anterior, cuando s’asitió nun 82 por cientu, pero ye entá más esmoleciente si miramos más p’atrás: nel 2017 foi del 72 por cientu y nel 2015 y 2016, del 69 por cientu.

En Secundaria, cuando l’asignatura empieza a competir con otres llingües como’l francés o l’alemán, la problemática de les medies xornaes ye enforma mayor qu’en Primaria. Ello provoca que munches de les places de les ales queden ensin cubrir al nun ser escoyíes polos profesores pol gastu y esfuerciu que-yos suponen.

Asina, danse situaciones como en Zarréu, cuando l’alumnáu matriculáu nun pudo recibir clase en tol añu al nun tener maestru, problemática que se dio n’otros 8 institutos mientres meses. “Esti cursu detectamos tamién resistencia a ampliar a xornada completa delles places que s’axudicaron como medies magar que les sos necesidaes horaries son superiores. Irregularidaes y falta d'atención vienen cronificándose dende va unos cursos y van tener efectos ésti: influir negativamente na escoyeta de l'asignatura”, alerten dende’l Sindicatu Unitariu Autónomu de Trabayadores de la Enseñanza d’Asturies (SUATEA).

El casu d’Infantil

Si en Primaria y Secundaria la escolarización n’asturianu y gallego-asturiano vive una situación llaceriosa, n’Infantil ésta ye enforma peor. Al alumnáu nun se-y ufierta la materia “debío a la irregular forma d’actuar de la nuestra Conseyería d’Educación: sólo nel casu qu’al profesoráu de Primaria contratao-y sobre hores llectives nel horariu”, una forma d’actuar “dafechu contraria a la Llei d’Usu”.

Por mor de l’altu porcentaxe de medies xornaes en Primaria, “ta nidio que nun hai nengún interés por atender a esta etapa educativa básica nel deprendimientu y sobrevivencia d’una llingua. D’ehí que’l númberu d’escueles con asturianu o gallego-asturiano na Educación Infantil seya ínfimu y qu’haya padres y madres a los que nun s’atiendan les sos demandes d’escolarización nes nuestres llingües”.

Dende SUATEA ufren el so apoyu tanto a la Conseyería d’Educación como a la de Cultura, Política Llingüística y Turismu pa solucionar esta problemática, que pasa por “acabar coles medies xornaes y la precariedá; discriminación positiva na elección voluntaria de l’asignatura, reconocimientu de la especialidá docente y concursu de tresllaos; formación del profesoráu; xeneralización de la ufierta en toles etapes educatives; y dotación presupuestaria”.

La conseyera d'Educación, Carmen Suárez Suárez, y el presidente Adrián Barbón inauguraron esta mañana'l cursu escolar d'Infantil y Primaria nel Colexu Rural Agrupáu de Villayón. Semeya obra d'Armando Álvarez.