Llamazares apuesta por un alcuerdu cola FSA y Podemos pal presupuestu

El voceru d'Izquierda Xunida (IX), Gaspar Llamazares, propón una mesa de negociación a trés bandes cola FSA-PSOE y Podemos col oxetu de negociar los presupuestos del 2017. Cree que podría ser tamién el xerme d'un posible gobiernu d'izquierda nel país.

Acompañáu por Manuel González Orviz, coordinador xeneral d'IX, y el conceyal Aurelio Martín, Llamazares protagonizó ayeri una rueda de prensa na Feria Internacional de Muestres d'Asturies (FIDMA) na que vislumbró'l mesmu escenariu que l'añu pasáu: una prórroga presupuestaria nueva. "Paez que tamos condenaos a ella", afirmó, polo que pa desbloquiar la situación presentó una propuesta consistente "nuna negociación tripartita, onde tea'l partíu socialista, Podemos y Izquierda Xunida. Somos mayoría nel parllamentu y tenemos el mensaxe de los ciudadanos de contribuyir a una mayoría de gobiernu, a un cambiu de Gobiernu n'Asturies, tripartitu y plural".

Sicasí, señaló que "enantes d'esi oxetivu, lo importante ye poner les bases a una mayoría parllamentaria. Eso significa empezar a dialogar a trés". Por ello, demanda "lideralgu por parte del Gobiernu" y "voluntá de diálogu tamién por parte de Podemos".