L'Hostelcur torna a cariciar el títulu de Copa

|
Calmar CP Vilanova 2-1 Hostelcur Xixón final de Copa 2018

Les xixoneses proclámense subcampeones per segundu añu consecutivu al caer por 2-1 col anfitrión, el Calmar CP Vilanova.

Rubén Muñoz nun pudo ganar la so primer final al frente del Hostelcur Xixón depués de que'l so equipu firmase una gran competición, eliminando en semifinales na tanda de penaltis al so verdugu l'añu pasáu y ún de los principales favoritos, el CP Voltregà, tres finar el partíu con empate a 3. La goliadora María Díez 'Peke' adelantó al conxuntu asturianu nel minutu 9, pero les catalanes, col apoyu d'un pabellón entregáu, igualaron el choque nel 31.

El tantu nun frenó'l xuegu del club de La Calzada, que buscó la portería contraria en too momentu, pero una contra del equipu llocal finó nun penalti qu'acabaría decidiendo'l partíu. Silva nun falló y los 8 minutos últimos convirtiéronse nun asediu por parte de les xugadores del Hostelcur que nun tuvo recompensa final.

D'esta forma, el Vilanova, actual sestu clasificáu na OK Lliga, consigue'l so segundu títulu de Copa de ḥoquei patinos femenín depués del algamáu nel añu 2009. Pela so parte, l'equipu xixonés, segundu na lliga regular a dos puntos del líder CP Manlleu y qu'en cuartos superó na prórroga al Generali HC Palau Plegamans por 6-3 (3-3), suma trés títulos nesta competición: los del 2012, 2013 y 2016.

Semeya obra de Luis Velasco (RFEP).

Contador Estadistiques