L'Hostelcur suma la so segunda OK Lliga siguida y tercera del so palmarés

|
Hostelcur 6-1 Vila-Sana títulu d'OK Lliga 2017-2018

El Vetusta tien un pie y mediu en Segunda B tres ganar 0-2 al Mutilvera, mentes que'l Sporting B trai un bon resultáu de Cornellà pa la vuelta (2-2) nel so camín hacia la Segunda.

L'Hostelcur Xixón completa una temporada espectacular con una Copa d'Europa y un títulu lligueru nuevu tres derrotar el sábadu nel pabellón de Mata-Xove al Vila-Sana por 6-1 a falta d'una xornada pa que fine'l campeonatu. D'esta forma, el club de ḥoquei sobre patinos femenín sigue aumentando la so llista de trofeos que convierten al Gijón Solimar nel más destacáu del país ente toles disciplines deportives: cinco copes d'Europa, trés lligues y trés copes estatales.

Les de Rubén Muñoz tuvieron inclusive cerca d'algamar el triplete, pero la derrota na final de Copa col Calmar CP Vilanova (2-1), equipu anfitrión de la fase final, impidió esta fazaña. L'Hostelcur entra agora nuna fase nueva de la so historia tres l'anunciada marcha del presidente Xuan Ramón Naves, col que llegaron los principales ésitos del conxuntu de La Calzada, tres 16 años al frente del equipu.

Amás, l'equipu va vivir una importante renovación, yá que'l téunicu tampoco va siguir la campaña próxima, al igual que dos de les dos xugadores más destacaes, la 'pichichi' María Díez 'Peke' y Anna Casarramona.

Arbitraxe caseru

El Sporting B algamó un importante empate na so visita al Cornellà nel partíu d'ida de la primer eliminatoria pol ascensu a Segunda División A. Los de José Alberto nun se vinieron abaxo tres el primer gol del conxuntu catalán, obra de Pere, y llegaron a ponese 1-2, ventaya que pudo ser mayor de nun anular el colexáu balear Sebastián Ripoll Solan un gol de Claudio por una inesistente falta del delanteru lleonés.

Al final, Mújica aprovechó un balón sueltu nuna rápida xugada llocal pa poner el tantu definitivu qu'igualaba los tantos del propiu Claudio y Juan Rodríguez, y que dexa la eliminatoria abierta pa la vuelta. El partíu va celebrase finalmente'l sábadu a les 18 hores en Mareo.

Superioridá azul

Un tantu de penalti materializáu por Borja nel minutu 10 punxo la eliminatoria de cara a un Vestusta superior en too momentu al campeón navarru, el Mutilvera. Steven, na segunda parte, marcaría el segundu del filial azul que, col trunfu por 0-2, dexa práuticamente sentenciáu'l crucie que da l'ascensu de categoría.

El restu d'equipos asturianos, a esceición del Marino que perdió 3-1 na so visita al UD San Fernando, algamaron resultaos positivos. L'UP Langreo golió al Alondras en Galicia (0-3), mentes que'l Llanes consiguió caltener la portería a cero en San Xosé col Portugalete (0-0)

El Sporting B xuvenil diz adiós a la Copa

La noticia negativa de la xornada foi la derrota por 4-0 del Sporting xuvenil en Zubieta que da'l pase a la Real Sociedad a cuartos de final por un global de 5-3. Adelantáronse rápido los donostiarres, nel minutu 16, por una falta, que tres tocar na barrera y despistar al guardamenta Mateusz, emburrió a gol Blasco.

Col 1-0, Gaspar unvió'l balón al palo y, na xugada siguiente, Eizaguirre ponía'l 2-0. Pese al esfuerciu de los d'Isma, la espulsión por tarxeta collorada direuta de Miguel Prado nel minutu 67, a lo que siguió un gol de llibre direuto de Roberto López pola mesma falta, acabó por sentenciar el partíu y la eliminatoria.

Semeya obra de Luis Velasco (RFEP).

 

Contador Estadistiques