L'Executivu decide dexar ensin funciones al Govern y convocar eleiciones nun plazu de 6 meses

|
Mariano Rajoy anuncia 155

L’aplicación del artículu 155 de la Constitución sigue alantre y esti vienres van votase nel Senáu les decisiones tomaes pol Conseyu de Ministros estraordinariu del sábadu. Ente elles destaca’l cese del Govern y la convocatoria, enantes de seis meses, d’eleiciones.

El PP, que pautara col PSOE y Ciudadanos ésta y el restu de midíes, pretende asina, según les pallabres del presidente Mariano Rajoy, cesar a les persones que punxeren l’autogobiernu de Catalunya “fuera de la llei”, descartando que suponga una suspensión de dicho autogobiernu nin de l’autonomía. Les eleiciones nueves convocaríense enantes de seis meses.

Ente’l restu de midíes tomaes pol Executivu estatal destaca l’asunción del mandu de los Mosssos d’Esquadra y la posibilidá de cesar cargos de TV3. Estes propuestes han de ser respaldaes el vienres pol Senáu, onde los populares tienen mayoría absoluta.

Respuesta dende Catalunya

El Parlament de Catalunya, tres conocer les decisiones de Madrid, convocó pa esti xueves un Plenu monográficu pa tratar l’asuntu. D’ehí saldrá la respuesta de Barcelona a l’aplicación del artículu 155, que podría ser la declaración unillateral d’independencia.

Nesi sen, Junts pel Sí nun quixo adelantar les sos intenciones, pola posibilidá de ser impugnáu dichu Plenu nel casu de que la secesión fora’l camín escoyíu. Mentes, la CUP, llamó güei a la ciudadanía a una “desobediencia civil masiva” y reclama que’l Parlament proclame la independencia’l xueves.

Contador Estadistiques