El Gobiernu estatal anuncia que va continuar colos trámites previstos nel 155 énte la posición de Puigdemont

|
Íñigo Méndez de Vigo declaración artículu 155

El sábadu ta convocáu un Conseyu de Ministros estraordinariu p’aprobar les midíes sobre Catalunya, que van llevase depués al Senáu, siguiendo los trámites previstos nel artículu 155 de la Constitución. Carles Puigdemont amenaza con votar nel Parlament la declaración unillateral d’independencia de siguir l'Estáu esi camín.

La respuesta que debía dar el presidente catalán al Gobiernu estatal tres el requerimientu fechu pol Executivu de Mariano Rajoy llegó poco enantes de la hora llende, les 10 hores, y nun esclarió lo que se-y solicitaba dende Madrid: “qu’informara de forma nidia y precisa si dalguna autoridá de Catalunya procediera a declarar la independencia d’esa comunidá autónoma” y, al empar, restituyera “l’orde constitucional alteráu”. Nel so llugar, Puigdemont abogaba pol diálogu y plantegaba la posibilidá de declarar la independencia nel casu de que se procediera a l’aplicación del 155 y siguiera "la represión": “El Parlament podrá proceder a votar la declaración formal de la independencia que nun votó'l 10 d'ochobre".

La reaición del Executivu foi la emisión d’un comunicáu nel qu’anunciaba que continuaría “colos trámites previstos nel artículu 155 de la Constitución pa restaurar la llegalidá nel autogobiernu de Catalunya” y la convocatoria d’un Conseyu de Ministros estraordinariu’l sábadu p’aprobar “les midíes qu’ellevará al Senáu a la fin de protexer l’interés xeneral de los españoles, ente ellos los ciudadanos de Catalunya, y restaurar l’orde constitucional na comunidá autónoma”. Nel mesmu tamién agradez “l’apoyu de les distintes formaciones polítiques coles que ta zarrando nestos momentos una respuesta mayoritaria y consensuada énte’l desafíu secesionista” y critica la postura de los responsables de la Generalitat por “buscar, a costafecha, l’enfrentamientu institucional a pesar del dañu grave que ta causando a la convivencia y la estructura económica de Catalunya”.

Sofitu de Javier Fernández al Executivu de Rajoy

Javier Fernández, presidente d’Asturies, entró a opinar esta mañana, a entrugues de periodistes, sobre esta situación nueva del conflictu políticu ente l’Estáu y Catalunya. “Creo que ye llamentable que’l presidente Puigdemont nun aprovechara esta oportunidá que tenía pa rectificar y agora lo único que queda ye apoyar al Gobiernu nes midíes que tenga qu’adoptar pa restituyir la llegalidá y l’orde constitucional en Catalunya”, aseguró’l socialista.

Na semeya, el voceru del Executivu, Íñigo Méndez de Vigo, na llectura de la declaración institucional tres recibir la respuesta de Puigdemont.

Contador Estadistiques