El PP y el PSOE pauten eleiciones en Catalunya

|
María del Carmen Calvo

La ex ministra socialista María del Carmen Calvo, una de les representantes del PSOE nes negociaciones col Gobiernu estatal sobre l’aplicación del artículu 155 de la Constitución en Catalunya, afirmó qu’hai un alcuerdu pa celebrar eleiciones en xineru nel país mediterraneu. Los populares nun confirmaron la fecha.

L’agora secretaria d’Igualdá del PSOE fixo esti avance esta mañana nel programa ‘Los desayunos de TVE’ a una entruga sobre una información espublizada ayeri por ‘eldiario.es’ qu’afirmaba esti alcuerdu. Asina, destacó que l’aplicación del 155 tien como oxetivu pa los socialistes la convocatoria de diches eleiciones y encamentó a Carles Puigdemont a que sía él el que les convoque pa evitar poner en marcha un artículu non emplegáu hasta la fecha.

Pa ello, tendría de fecha hasta’l día 27, cuando ta previsto que’l Senáu vote les midíes que decida tomar el Conseyu de Ministru estraordinariu de mañana. Ésti convocóse ayeri énte la falta de concreición del presidente catalán énte’l requerimientu fechu pol Gobiernu estatal.

El PP nun pon fecha

Poco depués de l’anuncia de Calvo, dende Moncloa señalaron que’l fin últimu de l’aplicación del 155 ye la celebración d’eleiciones en Catalunya, anque descartaron que se concretara yá xineru como mes pa les eleiciones. Asina, el voceru del Gobiernu, Íñigo Méndez de Vigo, afirmó que “ye prematuro falar de feches d’eleiciones”.

Contador Estadistiques