L'ex rector Juan Vázquez liderará la candidatura de Ciudadanos nes eleiciones a la Xunta

|
Juan Vázquez con Santiago García Granda nel homenaxe a Leopoldo Alas Argüelles 2017

Va acudir al procesu de primaries del partíu.

Juan Antonio Vázquez, rector de la Universidá d'Uviéu ente los años 2000 y 2008, aceptó la propuesta de Ciudadanos pa liderar la so candidatura pa les Nacionales del 26 de mayu. El caderalgu d'Economía Aplicada ha de pasar previamente pol procesu de primaries de la formación naranxa, anque se da por fecho que va encabezar la llista.

Dende sectores venceyaos al movimientu de reivindicación llingüística recuérdase que Vázquez nun se distinguió por ser una persona favoratible al asturianu nin na so etapa al frente de la Universidá d'Uviéu hebo avances na normalización del idioma na institución, negándose inclusive a aceptar tesis doctorales n'asturianu.

Como recordamos nesta noticia de la nuesa hemeroteca, nes eleiciones al Rectoráu del 2004, cuando competía con Vicente Gotor, refugó a aconceyar cola Xunta pola Defensa de la Llingua Asturiana (XLDA) al considerala una organización ensin pesu pa sentase con ella.

El probable candidatu, que tovía nun marcó les prioridaes del programa col que va presentase, sí afitó la so intención de que n'Asturies s'abre un ciclu nuevu marcáu pola "ilusión".

Na imaxe, Vázquez –primeru pela derecha– nun homenaxe de la Universidá d'Uviéu y el Conceyu d'Uviéu al rector Leopoldo Alas Argüelles celebráu nel 2017 pol 80 aniversariu del so fusilamientu xunto col –d'izquierda a derecha–caderalgu d'Historia Jorge Uría, el profesor de Psicoloxía Ignacio Loy, el rector Santiago García Granda, el caderalgu y nietu del homenaxáu Leopoldo Tolivar y l'ex rector Alberto Marcos Vallaure. Semeya propiedá de la Universidá d'Uviéu.

Contador Estadistiques