Juan Vázquez descalifica les tesis n’asturianu

L'historiador Faustino Zapico, al que los servicios xurídicos de la Universidá d'Uvieu nun dexaron el pasau mes d'abril inscribir la so tesis doctoral "corrientes federalistes y autonomistes n'Asturies 1808 - 1983" por redactar la memoria de la mesma n'asturianu, recibió una rempuesta firmada de puñu y lletra del Rector Juan Vázquez al so recursu de protesta pola decisión de los alministrativos universitarios na que'l rector de la universidá asturiana desarrolla argumentos de toa triba pa xustificar la decisión de nun almitir a trámite'l so trabayu doctoral.

Na carta que-y unvió'l rector firmada del so puñu y lletra a Faustino Zapico desestimando'l so recursu, Juan Vázquez desmanga los dos argumentos en que se tenía la protesta del doctorandu pa que-y almitieren la so tesis n'asturianu. En primer llugar, Juan Vázquez diz que, anque los estatutos de la Universidá afirmen que nun se va discriminar a naide pol usu del asturianu, ello unicamente diba ser posible "en casu de que l'asturianu fuere llingua oficial, cosa que nun se da". La sorpresa de Faustino Zapico énte esta rempuesta ye mayúscula y el doctorandu llama l'atención sobre'l fechu de que si l'asturianu fuere oficial nin siquiera fadría falta que los estatutos de la Universidá lo mencionaren.

Sicasí, ye'l segundu argumentu del rector Juan Vázquez el que más sorpresa-y causó al profesor d'historia mierense. Ello ye que nel so recursu Faustino Zapico ficiere mención a la esistencia con anterioridá d'otres tesis redactaes n'asturianu dientro de la Universidá d'Uviéu, citando casos concretos. La rempuesta del rector a esti argumentu ye fulminante al afirmar Vázquez que "nun cabe la igualdá na illegalidá" un argumentu que lleva a Faustino Zapico a entrugase si agora-yos van quitar los títulos doctorales a los demás doctores que lleeron les sos tesis n'asturianu.

Faustino Zapico diz que dellos puntos del escritu que-y mandó Juan Vázquez atiesten col absurdu total, como cuando'l Rector-y diz a Zapico que "nun tien derechu a rellenar formularios n'asturianu" en referencia a un formulariu en que namás figuraba'l nome del doctorandu, la so dirección y el títulu de la tésis, títulu que la Universidá si permite inscribir n'asturianu. Too ello lleva a Zapico a camentar que'l Rector Juan Vázquez tien con esti asuntu "una especie de zuna idiota" y que tien "gana de metese nun asuntu en que ta faciendo'l ridículo".

El casu ta agora en manes de la Xunta Pola Defensa de la Llingua Asturiana y de los servicios xurídicos de l'asociación "Oficialidá" que va interponer un recursu contenciosu alministrativu y que ta estudiando la posibilidá de denunciar por prevaricación al Rector en cuantes que s'entiende qu'aplicó inxustamente una llei a sabiendes d'ello.

Contador Estadistiques