El rector quíta-y responsabilidá a la Universidá nel casu de la tésis n'asturianu

L'Academia de la Llingua Asturiana (ALLA) celebró ayeri n'Uviéu l'actu d'entrega de los sos tradicionales cursos de branu, que se celebraron nel conceyu d'Ibias el pasáu mes d'agostu. Na so intertvención, la responsable de l'ALLA Ana Cano fizo una valoración positiva d'esta edición de los cursos, emponderando'l bon ambiente académicu que se vivió nos mesmos. La presidenta de l'ALLA nun perdió la oportunidá pa interpelar al Rector de la Universidá d'Uviéu, Juan Vázquez, que representaba nel actu a la entidá académica que convoca los cursos xunta la ALLA y delantre del qu'Ana Cano remembró l'eternu problema de la titulación en Filoloxía Asturiana y el casu particular del historiador Faustino Zapico, al que la institución académica nun almitió a trámite la inscripción de la so tésis doctoral por tar redactada n'asturianu.

El máximu responsable de la Universidá retrucó por alusiones a la presidenta de l'ALLA nel so turnu d'intervención esplicando que, no tocante a la titulación en Filoloxía Asturiana too ta pendiente agora de les decisiones que se tomen nel marcu de la reforma de les titulaciones universitaries nel marcu de l'adaptación al espaciu común educativu européu, mientres que nel casu del doctorandu n'Historia, la negativa a aceptar a trámite la so inscripción n'asturianu debióse a que los formularios refugaos son los mesmos pa toa España y en cuantes que trescienden l'ámbitu asturianu nun podíen dir escritos n'asturianu.