L’ex direutor de ‘ABC’ desvela una llamada de Javier Fernández pa dar batalla contra la oficialidá

“Como los periódicos de aquí no van a dar esta batalla, por favor darla desde el ‘ABC’. Esto de que se legalice y que se haga cooficial el bable es una barbaridad”, asegura Bieito Rubido que-y treslladó Javier Fernández na llexislatura anterior cuando’l periodista yera direutor del mediu y el socialista presidente d’Asturies. Desvelólo esti vienres nel programa ‘Es la mañana de Federico’ d’esRadio.

Federico Jiménez Losantos convidó pa la ‘Tertulia de Federico’ a Rubido y a Eduardo Inda, que nun momentu del alderique nel que falaben del presidente socialista d’Aragón, Javier Lambán, saltaron a la llingua aragonesa y, darréu, al asturianu. “Igual que en Asturias, la Chunta quiere imponer una ‘fabla’ del norte de dos valles de Aragón como idioma aragonés”, principió esclamando’l conductor.

Nesi momentu, el periodista gallegu, direutor de ‘ABC’ del 2010 hasta setiembre d’esti añu, interrumpió dixendo “yo puedo contarte una cosa”. “Federico, yo puedo contarte que a mí, Javier Fernández, presidente del Principado de Asturias, del PSOE, en la legislatura anterior, me llamó y me dijo ‘como los periódicos de aquí no van a dar esta batalla, por favor darla desde el ‘ABC’. Esto de que se legalice y que se haga cooficial el bable es una barbaridad’. Me lo dijo Javier Fernández”, insiste Rubido, “y me dijo que detrás de esto, viene a continuación el independentismo”.

L’alderique al rodiu l’asturianu siguió per dos minutos, tresmitiendo delles falsedaes y incorreiciones. Pue sentir les declaraciones de los trés tertulianos calcando nesti enllaz (a partir del minutu 44.44).

Na imaxe, Fernández nun Plenu de la Xunta Xeneral cuando yera presidente. Semeya obra d'Armando Álvarez.