“Nun tien sentíu poner en marcha la cooficialidá nesta llexislatura”, asegura Javier Fernández

Javier Fernández tornó a falar sobre la cooficialidá del asturianu y el gallego-asturiano tres la finalización del Alderique d'Orientación Política Xeneral que se celebró la selmana pasada na Xunta Xeneral. “Nun tien sentíu ponela en marcha nesta llexislatura”, afirmó’l presidente del país sobre un asuntu que considera "sensible".

A entrugues de los periodistes tres la tercer y cabera sesión del Alderique d'Orientación Política Xeneral, celebráu’l vienres y nel que’l Parllamentu refugó una propuesta del PP pa “rechazar la cooficialidá del bable” con astención socialista, Fernández insistió otra vuelta en que nun va haber oficialidá nesta llexislatura pese al cambiu de criteriu na FSA refrendáu nel congresu últimu del partíu. “L’astensión respuende a la esplicación que di sobre l’asuntu nel senu del alderique. La mio posición propia ye conocida nesi asuntu y la del partíu socialista, pero no que tamos d’alcuerdu toos ye que la cooficialidá, qu’agora forma parte de les propuestes del partíu d’alcuerdu col so congresu, nesta llexislatura nun tien sentíu ponela en marcha; nin facer nengún tipu de valoración”, apuntó.

Darréu recordó otra vuelta qu’él se presentó a les eleiciones con “otru plantegamientu distintu con respeuto a la llingua asturiana, y a min me paez un asuntu suficientemente sensible como pa qu’un partíu seriu, y eso-y paez tamién a la FSA, cuando se presente diga: ‘va haber cooficialidá’, cómo va ser esa oficialidá, etc. Polo tanto nesta llexislatura nun va tener llugar y tampoco procede que faigamos pronunciamentos al rodiu esi asuntu”, finó.

Semeya d'Armando Álvarez.