La posición sobre la oficialidá divide a la guardia vieya de la FSA

Nomes significativos del sector que cuestiona a Adrián Barbón sofitaron la oficialidá nel pasáu, como Antonio Trevín o'l candidatu que remana esti piñu de persones, Guillermo Martínez. Fernando Lastra, col apoyu de José María Pérez y Luis Ramón Fernández Huerga, amosó'l so refugu a la igualdá de derechos de los falantes d'asturianu colos de castellanu nel comité autonómicu de la FSA-PSOE del sábadu, llegando inclusive a solicitar una consulta interna.

Cada día que pasa, ye más díficil qu’el sector derrotáu n’Asturies nos últimos congresos de la Federación Socialista Asturiana (FSA) presente un candidatu alternativu a Adrián Barbón nes primaries previstes pal 10 de xunu pa decidir el nome del cabeza de llista a la presidencia del país. Parte d’esi sector remana el supuestu refugu internu a la oficialidá como lleldu pa encadarmar esa alternativa, pero tópase con que nomes significativos de la corriente derrotada defendieron públicamente esa opción nel pasáu.

Esta contradicción pudo vese nel comité autonómicu de la FSA-PSOE del sábado pasáu, del que, precisamente, salió’l nome de l’actual secretariu xeneral como más que previsible candidatu socialista al Gobiernu. Nesi foru, l’actual conseyeru d’Infraestructures, Fernando Lastra, amosó’l so refugu a otorgar el rangu llegal máximu al asturianu y pidió una consulta interna.

Con él, y magar qu’hai unes selmanes votó a favor de la oficialidá nel Plenu del Conceyu, tuvieron el voceru municipal xixonés, José María Pérez, y el secretariu xeneral del PSOE d’Avilés, Luis Ramón Fernández Huerga, toos ellos destacaos representantes del sector derrotáu nes caberes confrontaciones internes. Sicasí, otro de los nomes más representativos d’esa corriente, l’ex diputáu Antonio Trevín, nun fexo referencia ninguna a la oficialidá, y ello magar que la so intervención foi, con diferencia, la más dura contra l’actual direición, sobre manera pola so decisión de llendar les primaries a militantes. 

Dase la circunstancia de qu’el tamién ex presidente d'Asturies foi ún de los primeros dirixentes socialistes que, a mediaos de los noventa, apostó pola oficialidá. De fechu, el candidatu que remana esti sector y persona de la máxima confianza de Trevín, el conseyeru de Presidencia, Guillermo Martínez, foi patronu de la Fundación Caveda y Nava, coleutivu apartidista que, demientres una década, dedicóse a trabayar el consensu sobre la oficialidá.

Martínez, con apoyos de sectores significativos d'UXT, sindicatu que tamién apuesta pola oficialidá

El nome de Martínez manéxenlo, amás, sectores significativos d’UXT, sindicatu que, yá dende los noventa, apostó por dar el máximu rangu llegal a la llingua. De fechu, el so secretariu xeneral n’aquella dómina, Eduardo Donaire, foi ún de los firmantes nel 1996 del Pautu pol Autogobiernu y la Oficialidá.

D’otramiente, a la manifestación del pasáu 21 d’abril asistió’l so actual líder, Javier Fernández Lanero. La crítica de Trevín a les primaries llendaes tien de ver precisamente porque zarralas a miltantes torga que puedan participar afilaos de la UXT, reduciendo asina les posibilidaes de Martínez.

D’esta manera, el refugu a la oficialidá, acullá de valir como aglutinante d’esta corriente, ta sirviendo pa lo contrario, p’aguiyar la división. Porque nun ye igual presentar al actual conseyeru de Presidencia y voceru del Executivu, favoratible a la mesma, qu’a Fernando Lastra, que fai bandera de la so oposición y qu’atopa ecu principalmente fuera del partíu, en sectores mediáticos mui influyentes y en personaxes concretos de la sociedá asturiana más conservadora. De fechu, el departamentu que dirixe, Infraestructures, ta devolviendo la señalética castellanizada a conceyos que lleven cola toponimia revisada dende hai más de diez años.

L'apaición de la derecha mediática madrilana

Hai que destacar que la idea de la consulta cola qu’agora Lastra intenta abrir fienda nun ye nueva. Plantegáronla sectores próximos a l’actual mayoría nel trentenu segundu Congresu de la FSA, celebráu n’ochobre del 2017, pero ellí mesmu quedó descartada al sofitar el 80 por cien de los delegaos la enmienda qu’incluyía el sofitu a la oficialidá.

Esi plantegamientu, sicasí, recuperólu más tarde ún de los más destacaos representantes del sector derrotáu, el voceru parllamentariu Marcelino Marcos. Persona de la máxima confianza de Lastra dende que, allá pel añu 2000, apadrinara la so entrada nel máximu órganu de direución del PSOE, les sos declaraciones en TPA nesi sen pasaron desapercibíes nel so momentu hasta que, selmanes depués, el diariu 'El Mundo', tradicionalmente contrariu al PSOE, decidió recuperales nel contestu de los ataques de la derecha mediática madrilana al procesu de oficialización. La cuestión, esta vez sí, pasó a  los medios de comunicación asturianos.

Díes después, primero la secretaria d’Organización de la FSA, Gimena Llamedo, y, depués, el propiu secretariu xeneral estatal Pedro Sánchez, decidieron enterrar la cuestión con declaraciones na televisión pública asturiana. Los dos recordaron que'l sofitu a la oficialidá ye una decisión del Congresu de la FSA.

Lastra, sicasí, recuperó la idea de la consulta esti sábadu nel máximu órganu ente congresos, anque Trevín, qu’intervinó después, nun recoyo’l guante.

Na semeya, recorte del diariu 'El Comercio' d'una noticia espublizada'l 29 de payares del 1996.