L'espíritu de Bimenes sigue vivu 20 años depués

El conceyu yerbatu guió a otros ayuntamientos del país que siguieron el mesmu camín declarando la oficialidá del asturianu no que se conoció daquella como l’espíritu de Bimenes

La declaración d’oficialidá fecha en Bimenes el 5 de xunetu del 1997 sirvió pa, per primer vez, reconocer los derechos de los ciudadanos a emplegar l'asturianu nel ámbitu d’un conceyu y foi pionera nun momentu nel que se taba discutiendo la reforma del Estatutu d’Autonomía colo qu’esti fechu algamó un valir simbólicu perimportante.

Casu, Morcín, Castrillón, Llangréu, Llaviana y Teberga tamién declararon la oficialidá, mentes que Ḷḷena, Mieres, Riosa, Ribeseya, Amieva y Corvera manifestáronse a favor de sacar alantre midíes y planes de normalización.

Nava, pela so parte, aprobó unes ordenances d’oficialidá que, como toles otres declaraciones, foron torgaes polos recursos presentaos nel 1998 énte'l Tribunal Superior de Xusticia d'Asturies (TSXA), con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello.

El primer avisu'l fíxolo l'Executivu, gobernáu pol PP, a Bimenes, en concreto José Ramón García Cañal, que per carta amenazó al conceyu yerbatu de la irregularidá que suponía esa declaración y alvirtió de que l'Ayuntamientu debería correr colos costos del procesu.

Darreú, el tamién popular Fernando Noval, como delegáu del Gobiernu estatal n'Asturies, decidió impugnar les declaraciones d'oficialidá, llevando'l casu énte'l TSXA, que paralizó cautelarmente les mociones de Llangréu, Casu y Castrillón, decisión que tuvo una gran repercusión na prensa del momentu.

El Tribunal Superior de Xusticia d'Asturies anuló ún per ún los alcuerdos plenarios de los conceyos asturianos que declararon la oficialidá, tres los recursos presentaos pola Delegación del Gobiernu estatal n'Asturies que llegó a plantegar qu’estes iniciatives de defensa institucional de los derechos llingüísticos creaben “alarma social”.
La formación política Andecha Astur llevó l'asuntu al Tribunal Supremu, pero esti falló na mesma direición que'l TSXA.

Na web de Xuristes pol Asturianu pue consultase una d'estes sentencies, en concretu la que torgó la oficialidá en Llangréu.

Anguaño, l’alcalde de Bimenes, Aitor García va tornar a poner en marcha’l procesu pa declarar la oficialidá y anovar el compromisu del conceyu de Bimenes cola llingua asturiana.