El Conceyu de Bimenes declarará la oficialidá otra vuelta'l 2 de xunetu

L'equipu de gobiernu plantega celebrar un Plenu nesa xornada pa declarar la oficialidá de la llingua asturiana nel conceyu yerbatu venti años depués de convertise nel primer ayuntamientu del país en dar esi importante pasu. Esti miércoles va aconceyar con un coleutivu llocal pa empezar a poner les bases al procesu.

L'alcalde Aitor García Corte, del Partíu Asturianista (PAS), busca asina asitiar otra vuelta'l focu na reconocencia de los derechos llingüísticos de los yerbatos y de tolos asturianos y, al empar, recuperar la importancia de la Fiesta de la Oficialidá de la Llingua Asturiana que tolos años conmemora la primer declaración d'oficialidá, fecha'l 5 de xunetu del 1997 siendo alcalde Joaquín García Gutiérrez 'Xuacu'. Naquel tiempu l'asuntu llevóse a los tribunales y el TSXA torgóla, al igual que la del restu de conceyos que siguieron el mesmu camín que Bimenes.

Mañana l'equipu de gobiernu conformáu pol PAS, IX y Xente Yerbato —col PSOE na oposición—, va aconceyar con un coleutivu llocal pa empezar a afitar tolos detalles d'una xornada que se pretende que sía mui especial. Va ser la primera d'otres munches nun procesu nel que s'espera involucar tamién a entidaes de fuera del conceyu.

Una de les opciones que se baraxen nun primer momentu ye llevar el Plenu nel que se va votar la oficialidá, el sábadu 2 de xunetu, a la cai pa compartir esi momentu con tolos ciudadanos. Venti años depués, Bimenes torna a garrar la bandera de la defensa de los derechos llingüísticos nel país.