"Bimenes ta mui ilusionao cola declaración d'oficialidá", diz García Corte

Ilusión. Ésa ye la pallabra que define l'estáu d'ánimu de los yerbatos nes hores previes a la XX Fiesta de la Oficialidá, na que va declarase esti sábadu otra vuelta la oficialidá del idioma en Bimenes. L'alcalde Aitor García Corte empondera la predisposición y collaboración de los ciudadanos y los coleutivos del conceyu nesta cita.

"Va too mui bien. Yá ta too preparao", esplica'l primer edil, que destaca les 280 reserves coles que cuenten pa la xira popular. "Nun podemos ufrir más meses y sielles y el que venga tendrá que sentase nel prau a xintar", esplica l'asturianista.

La cita nun desmerez y la espectación pola declaración d'oficialidá otra vuelta nel conceyu depués de la del 5 de xunetu del 1997, torgada pol recursu presentáu nel 1998 énte'l Tribunal Superior de Xusticia d'Asturies (TSXA), con sentencia ratificada pol Tribunal Supremu al considerar los tribunales que los ayuntamientos nun tienen competencia pa ello, ye grande tanto dientro como fuera del conceyu. "El testu de la declaración yá ta preparáu. Nun ye nada agresivu y fai referencia a los testos y organismos internacionales que nos amparen a desendolcar esti derechu", apunta García Corte.

Pa sofitar esti pasu dau pol Ayuntamientu de Bimenes, van tar presentes conceyales de diferentes signos políticos, asina como diputaos na Xunta Xeneral, que roblaron la campaña entamada xunto cola Xunta pola Defensa de la Llingua Asturiana 'Conceyos pola Oficialidá'. Tamién va acudir a la celebración l'alcalde de Miranda de l Douro, Artur Nunes, territoriu hermanáu recién con Bimenes.

"Yo toi mui ilusionáu y Bimenes tamién cola declaración d'oficialidá", añade l'alcalde, que destaca la predisposición y collaboración de  los coleutivos llocales pa la gran cita de mañana. Recupérase'l noma 'Espíritu de Bimenes'.

Na semaya, García Corte –a la derecha– en Miranda xunto col alcalde llocal Nunes.