“L’ésitu de la UABRA nun ye cuestión del azar, sinón del trabayu constante y bien fechu”, afirma Piñán

La primer intervención pública de Berta Piñán como conseyera de Cultura, Política Llingüística y Turismu tuvo llugar esti llunes na inauguración de la Universidá Asturiana de Branu (UABRA). “El so ésitu nun ye cuestion del azar, sinón del trabayu constante y bien fechu, con una idea global de lo que ye la formación”, apuntó.

Un añu más, y yá van diez, echa a andar la UABRA en Cangas. Dende güei y hasta’l 9 d’agostu más de 130 persones, de les qu’un centenar son alumnes y alumnos, van pasar pela Escuela-Hogar pa participar nos seis cursos que s’imparten nesta edición de los cursos nos que collaboren la Universidá d’Uviéu, formando parte de la estensión universitaria, y el Conceyu de Cangas del Narcea.

“Anque equí llevamos diez años, los Cursos de Branu de l’Academia echaron a andar nel 83, hai casi 40. Siempre contaron con un númberu altu de participación, lo qu’amuesa l’interés que la xente sigue teniendo pol asturianu y por aldericar sobre cuestiones relatives a la cultura asturiana”, espresa Xosé Ramón Iglesias Cueva, secretariu de la UABRA y tamién de l’ALLA, que recuerda que los númberos que se manexen tolos años, ente 130 y 150 persones, son el tope qu’ufre la Escuela-Hogar de Cangas. “El so ésitu nun ye cuestion del azar, sinón del trabayu constante y bien fechu, con una idea global de lo que ye la formación”, añade Piñán, satisfecha de que les instalaciones “desborden” pa acoyer “esti llugar d’alcuentru inteleutual y universitariu, de formación”, que ye la UABRA.

La conseyera de Política Llingüística desplazóse a Cangas pa participar na inauguración de la cita, celebrada na Casa la Cultura Palaciu d'Oumaña, na que tamién tuvieron presentes el propiu Iglesias Cueva, el vicerrector d’Estensión Universitaria y  Proyeición Internacional de la Universidá d’Uviéu, Francisco Borge, y la teniente d’alcalde Laura Álvarez García. Depués de tomar posesión el xueves, la de güei yera la primer intervención pública de la escritora de Caño –non el so primer actu oficial, yá qu’ayeri acudió xunto cola titular de Derechos Sociales y Bienestar, Melania Álvarez, al XXVI Descensu del Seya Adaptáu–, dalgo “que me fai muncha ilusión”, destacó, pa depués recordar que la UABRA “ye un llugar al que yo vine en diferentes calidaes: de profesora, de collaboladora y, agora, de conseyera nesti momentu tan especial pa la lliteratura asturiana y pa la llingua asturiana”.

Discursu con amplia carga lliteraria

Pal so primer discursu nun actu como conseyera, y nun sitiu tan simbólicu como la UABRA, Piñán preparó nun testu con una amplia carga lliteraria. Nel mesmu reconoció asumir el cargu “con un altu sentíu de la responsabilidá, y nengún llugar meyor pa estrename nesti llabor que la inauguración de la Universidá Asturiana de Branu, porque nun tamos equí por casualidá o por azar. Tamos equí pol trabayu constante y consciente de delles xeneraciones asturianes que tienen puesto lo meyor de sigo meses nesti camín difícil y apasionante de llevar la nuesa llingua al llugar de la visibilidá y de la dignidiá que-y correspuende nesti mundu complexu, diversu y cambiante”.

“Llevamos décades trabayando na construcción d’una cultura que quier ser, d’espresar el mundu n’asturianu. Cualquier otra cosa diba ser una falta de llealtá pa cola nuesa historia como pueblu, pero tamién pa coles nueses histories personales. Pa con tantes xeneraciones que caltuvieron la llingua viva y con ella reconocieren la so primer mirada sobre’l mundu”, apuntó tres destacar el papel que tienen les instituciones de velar por esti “patrimoniu inalienable de la cultura d’un pueblu” que ye l’idioma.

Iglesias Cueva, pela so parte, dedicó la so intervención a detallar les novedaes de la UABRA d’esti añu y, como respresentante de l’ALLA énte l’ausencia por motivos académicos del presidente Xosé Antón González Riaño, destacó “la allegría” que siente la institución pola intervención n’asturianu del presidente d’Asturies, Adrián Barbón, “anque fora simbólica”, porque “lo que dixo ruempe con esa visión de les élites polítiques de que l’asturianu yera dalgo a conservar del pasáu. Agora mírase al futuru”.

Tamién fixo referencia a la “esperanza” que se vive nesti momentu, con ilusión p’avanzar hacia la oficialidá, anque nun haya agora la mayoría parllamentaria necesaria pa declarala: “La oficialidá por sí mesma nun soluciona’l futuru. Soluciónalu una política llingüística qu’hai que comenzar a facer”, aseguró.

Los cursos

Dende güei, y mientres les dos selmanes de la UABRA, van desendolcase na Escuela Oficial d’Idiomes de Cangas los trés cursos llingüísticos, esto ye, el ‘Cursu Elemental de Llingua Asturiana’, el ‘Cursu Avanzáu de Llingua Asturiana’ y ‘Curso de Gallego-asturiano’ na so fase primera de les trés de les que se compón el Programa de Capacitación en Gallego-asturianu pra Profesores, titulación esixida pa dar la materia en Primaria y Secundaria. Amás, va impartise, dientro de la estaya ‘Cursos d’Afondamientu Cultural y Llingüísticu’, el de ‘Capacitación pa la traducción al asturianu’, dirixíu por Marta Mori, que fina’l vienres.

La selmana que vien va ser el turnu de ‘El patrimoniu cultural asturianu. Un averamientu dende l’enguedeyu de lo tanxible y lo intanxible’, dirixíu por Jesús Fernández Fernández, y ‘De la lletra al testu: taller d’escritura creativa’, con Aurelio González Ovies al frente. Tolos cursos, a esceición del de gallego-asturiano, formen parte tamién de los Cursos d’Estensión Universitaria, dirixíos a los estudiantes de toles estremaes carreres de la Universidá d’Uviéu, cola posibilidá de sumar ente 5 y 6 creitos de llibre configuración.

Xeres complementaries

La esposición itinerante ‘Voces. La llingua asturiana al traviés de los sieglos’, que yá tuvo como sedes el Muséu Arqueolóxicu d’Asturies, n’Uviéu, y la Casa la Cultura María Xosefa Canellada, en Santolaya, inauguróse güei con motivu del comienzu de la UABRA. La Casa de la Cultura Palaciu d’Oumaña acóyela.

Les xeres complementaries previstes pa estos díes, abiertes a tola ciudadanía, complétense con cuatro conferencies nel salón d’actos de la Escuela-Hogar, con comienzu a les 19 hores toes elles. La primera va ser, mañana, ‘L’osu n’Asturies: implicaciones sociales y económiques’, a cargu de Víctor M. Vázquez, biólogu y miembru numberariu del RIDEA, pa siguir el xueves con ‘Úa television pública al servicio d’Asturias’, de Cristóbal Ruitiña, periodista de RTPA.

Na segunda selmana, el martes 6, Raúl Suevos, analista de seguridá internacional, va falar de ‘La política de defensa n’Europa. Análisis xeopolíticu y alternatives’, mentes que la intervención del xueves 8 va dedicase a los ‘Exes de la política llingüística n’Asturies’, con ponentes entovía por confirmar. Amás, va haber espaciu pa la música nel Teatru Toreno esti miércoles y el viniente con L-R y A Comuna del Barruzo, de manera respeutiva, actuaciones con comienzu previstu pa les 22.30 hores.

Na semeya, Iglesias Cueva, Piñán, Borge y Álvarez García.