La UABRA vive la so segunda selmana de clases y actividaes

Raúl Suevos pon una conferencia esti martes y los cantares de 'A Comuna del Barruzo' protagonicen un conciertu'l miércoles.

Yá comenzó la segunda y cabera selmana de la décima edición de la Universidá Asturiana de Branu (UABRA), entamada en Cangas del Narcea pola Academia de la Llingua Asturiana en collaboración cola Universidá d'Uviéu y el Conceyu. Les clases nos trés cursos principales, esto ye, el ‘Cursu Elemental de Llingua Asturiana’, el ‘Cursu Avanzáu de Llingua Asturiana’ y ‘Curso de Gallego-asturiano’ na so fase primera de les trés de les que se compón el Programa de Capacitación en Gallego-asturianu pra Profesores, siguen, mentes qu'ayeri dieron comienzu los dos restantes d’Afondamientu Cultural y Llingüísticu, de cinco díes de llargor.

Jesús Fernández Fernández dirixe ‘El patrimoniu cultural asturianu. Un averamientu dende l’enguedeyu de lo tanxible y lo intanxible’, mentes qu'Aurelio González Ovies fai lo propio con 'De la lletra al testu: taller d’escritura creativa’. La selmana pasada púnxose el de ‘Capacitación pa la traducción al asturianu’ baxo la supervisión de Marta Mori.

Xeres complementaries

L'actividá na UABRA nun tien llugar namái nes clases, sinón que sal fuera d'éstes pa llegar a tola ciudadanía. Esta tarde, a les 19 hores nel salón d’actos de la Escuela-Hogar, l'analista de seguridá internacional Suevos va poner la conferencia ‘La política de defensa n’Europa. Análisis xeopolíticu y alternatives’.

Mañana, mentes, a les 22.30 hores, el Teatru Toreno va acoyer un conciertu colos cantares de 'A Comuna del Barruzo', llibru-discu en gallego-asturiano sobre personaxes qu'habiten l'Eo-Navia. El xueves taba programada una charra baxo'l nome ‘Exes de la política llingüística n’Asturies’, anque ésta al final nun se va entamar.

Lo que sí se pue visitar hasta'l final de la UABRA ye la esposición itinerante ‘Voces. La llingua asturiana al traviés de los sieglos’, na Casa de la Cultura Palaciu d’Oumaña. La so parada siguiente va ser Xixón la selmana qu'entra.

Na semeya, el periodista Cristóbal Ruitiña mentes la conferencia ‘Úa television pública al servicio d’Asturias’ del xueves pasáu.